Tulo ka mga durugista, duha kanila mga magsuon, nadakpan sa kapulisan sa Cebu City Police Office (CCPO) sa managlahi nga mga buy-bust sa Biyernes sa kaadlawon, Abril 19, 2024.
Usa sa nadakpan sa Parian Police Station giila nga si Lyle Matañoza, 33, taga Tres de Abril St., Barangay Labangon apan nasikop sa Sitio BSJCO, Barangay T. Padilla, Dakbayan sa Sugbo.
Ang suspek nakuhaan og mga putos sa gituohang shabu nga motimbang og 10 gramos nga dunay standard drug price nga P68,000 ug mga drug paraphernalia. Nadakpan usab sa Waterfront Police Station ang usa ka 44 anyos nga lalaki sa Sityo Silangan 1, Brgy. Tinago nga giila nga si Michael Olivar Vasquez, alyas Baki.
Nasakmit gikan kaniya ang 10.5 gramos nga gituohang shabu nga dunay kantidad nga P71,400.
Lakip sa nadakpan ang iyang igsuon nga si Evmar, alyas Emay, 36, nagpuyo ra usab sa lugar.
Nakuha usab sa iyang posisyon ang 10 gramos nga gituohang shabu nga dunay balor nga P68,000. / AYB