Tulo ka eskwelahan sa Sugbo, duha niini gisuspenso ang klase, human nakadawat og hulga sa pagpamusil niadtong Lunes, Agusto 24, 2026.
Kini mao ang Don Vicente Rama Memorial National High School (DVRMNHS) sa Barangay Basak San Nicolas, Dakbayan sa Sugbo, Mactan National High School sa Dakbayan sa Lapu-Lapu, ug Lut-od National High School sa Lungsod sa Pinamungajan.
Sa DVRMNHS, nagpadayon gihapon ang klase taliwa sa nadawat nga hulga sa social media tungod kay examination period sa mga estudyante.
Gipahibalo ni Cebu City Councilor Dave Tumulak nga nakadawat og hulga ang eskwelahan mga alas 2:30 sa kadlawon gikan sa usa ka account nga ginganlan ug "JC JC" nga nag-post nga "mamusil" sa tunghaan.
Gipaneguro ni Tumulak nga walay angay ikabalaka sanglit gipahugtan na sa mga awtoridad ang seguridad ug gisubay na ang hulga. Aron mas luwas, gibalhin ang entrance sa mas hawan nga bahin sa tunghaan samtang nakig-alayon na sila sa Mambaling Police Station.
Sa Mactan National High School, gisuspenso ang face-to-face classes hangtod sa Miyerkules, Agusto 26, human nikaylap ang hulga sa pagpamusil sa usa ka pribadong group chat.
Nakig-coordinate dayon ang tunghaan sa Police Station 2 ug gipasa ang impormasyon sa Cybercrime Unit sa kapulisan.
Nailhan na ang estudyante nga giingong nipakatag sa mensahe ug giatiman na sa mga opisyal. Giawhag sa eskwelahan ang tanang mga estudyante nga magpabiling kalmado samtang magpadayon ang klase pinaagi sa modular learning.
Sa Lut-od National High School, gipapauli ug gipangsuspende ang tanang klase sa Lunes sa buntag human makadawat sab og hulga sa pagpamusil.
Nakigtagbo dayon si Acting School Principal Maribel Cabatuan sa kapulisan aron segurohon ang kaluwasan sa tanan.
Nagpadayon karon ang imbestigasyon nga gipangulohan sa Municipal Social Welfare and Development (MSWD) ug sa Philippine National Police (PNP) samtang gisusi pa kon kanus-a mabalik ang normal nga klase. / DPC, ABC, JDG