TULO ka mga drug personality ang nangadakpan sa managlahi nga anti-illegal drug operation sa Inayawan Police Station 7 sa Cebu City Police Office sa gabii sa Martes, Hunyo 10, 2025, ug kapin sa P200,000 nga balor sa ilegal nga drugas ang nasakmit.
Ang labing uwahi nga buy-bust nahitabo sa Sitio Sto. NiƱo, Barangay Poblacion Pardo, Dakbayan sa Sugbo alas 11:25 sa gabii nga niresulta sa pagkasikop sa usa ka babaye.
Unang nadakpan giila nga si Jenefer Suniega Padigos alyas Jeggy nga residente ra sab sa maong lugar.
Nakuha gikan sa posisyon sa suspek ang mga pinakete sa gituohang shabu nga motimbang sa 10.36 gramos nga dunay balor nga P70,448.
Pagkaalas 10:20 sa gabii, laing drug personality ang nadakpan sa Sitio Campar, Barangay Poblacion Pardo.
Ang suspek mao si Carl Vincent Donasco Midel alyas Bibo nga nagpuyo ra sab sa maong lugar kinsa nakuhaan og 10.20 gramos nga gituohang shabu nga dunay standard drug price nga P69,360.
Nadakpan ang laing drug personality alas 9:15 sa gabii sa Sitio Maxipino, Barangay Bulacao, Dakbayan sa Sugbo.
Ang nabalhog sa prisuhan sa Inayawan giila nga si Rene Manalo Llamedo alyas Opaw.
Nakuhaan si Opaw og 10.28 gramos nga gituohang shabu nga mobalor sa P69,904.
Ang tulo ka mga suspek mag-atubang og kasong kalapasan sa Section 5 ug 11, Article II Republic Act 9165. / AYB