3 nakuhaan og armas, nasikop

Nakuhaan og armas ang tulo ka mga tawo atol sa manag­lahig sa Lalawigan sa Sugbo sa pag-serve og search warrant niadtong Marso 8 ug 9, 2025.

Ang Sawang Calero Police Station 6 nironda sa panimalay sa usa ka 52 anyos nga lalaki sa Sityo Mahayahay 2, Barangay Pasil, Dakbayan sa Sugbo pinasikad sa search warrant nga giluwatan ni Judge Anacleto Debalucos sa RTC Branch 17, alas 8:57 sa gabii, Dominggo, Marso 9, 2025.

Ang suspek nga si Joel Ayala Sargento nakuhaan og usa ka .357 Magnum Smith and Wesson ug upat ka mga bala sa sulod sa iyang panimalay.

Pagka alas 11:40 sa gabii sa Sabado, Marso 8, 2025 napusasan usab ang 44 anyos nga lalaki human makakuha ang mga polis sa Mambaling nga maoy nag-serve og search warrant og usa ka kalibre .45 nga pistola og duha ka buhing bala.

Ang subject sa warrant giila nga si Lyndon Cabrillas nga taga Sityo Dapdap, Barangay Mambaling sa Siyudad sa Sugbo.

Lakip sa nadakpan si Jucel Dacalos, alyas Galoy, 35 nga nagpuyo sa maong lugar nga nakuhaan og kalibre 38 nga revolver ug tulo ka bala sa mga sakop sa Inayawan Police Station sa Sityo Ciwac, Barangay Bulacao, Dakbayan sa Sugbo.

Ang mga suspek gipasakaan og kasong kalapasan sa Republic Act 10591 o Comprehensive Firearms and Ammunition Regulation Act, ug Comelec gun ban nunot sa nagsangabot nga midterm elections sa Mayo 2025.

Ang kapulisan nipatuman sa ilang hugot nga kampanya batok sa loose firearms aron dili magamit sa pagpanghulga ning pagsud na sa pagpangm­panya sa eleksiyon ug magmalinawon ang pagpahiga­yon sa eleksiyon. /AYB