Natanggong sa bilanggoan ang tulo ka mga lalaki human nangadakpan sa akto sa paghimo og ilegal nga kalihukan nga gitawag og swertres sa managlahing operasyon sa Dakbayan sa Mandaue.
Unang nadakpan mga alas 7:00 pasado sa gabii niadtong Agusto 13, nailhan nga si alyas Dandan, 40, sa may L. Jayme Street, Sitio Marfa, Barangay Bakilid.
Matod pa, si Dandan nasakpan sa akto sa sakop sa Members of the City Intelligence Ulnit kun CIU nga nangulekta og ilegal nga pusta.
Gikataho nga nasakmit gikan sa posisyon sa suspek ang mga ilegal nga ebedensiya hinungdan nga gidakop kini.
Sa pikas bahin, niadtong Agusto 16, laing duha ka mga lalaki ang nasikop nga nalambigit usab sa maong ilegal nga kalihukan.
Mga alas 3:00 pasado sa kahapunon, unang nadakpan si Alyas Alvin, kinsa taga Dakbayan sa Lapu-Lapu apan nasakpan kini sa A. Del Rosario Street, Barangay Guizo.
Samtang pagka alas 6:45 sa gabii. nasikop sa mga operatiba ang 23 anyos nga si Gerry sa may Purok Dosong, Upper Casili.
Ang duha ka mga dinakpan pulos naaktohan nga naghimo sa ilegal nga kalihukan lakip nga nakuha kanila ang kuwarta nga gipangpusta ug uban pang mga ebidensya.
Si Mandaue City Police Office- City Director Police Colonel Cirilo B. Acosta Jr., mitawtaw nga ang ilegal nga operasyon sa swertres mamahimong silotan ubos sa balaod ug padayon ang ilang pahimangno ug pasidaan sa mga katawhan nga dili nalambigit niinit.
“We are intensifying our operations against all forms of illegal gambling. These arrests should serve as a reminder that the law will be strictly enforced,” asoy ni Acosta.
Ang tulo ka mga dinakapn anaa na sa kustodiya sa kapulisan sa Mandaue diin gipahibaw na usab sa ilang kalapasan. / JDG