3 napaso pagbuto sa butane canister

3 napaso  pagbuto sa butane canister
SunStar Local News GPX

NAGPASIDAAN kanunay ang awtoridad bahin sa paggamit sa butane canister nga nakapasar sa pagsusi ug silyado sa Department of Trade and Industry (DTI)

Apan niadtong Sabado, Pebrero 10, 2024, alas 6:00 sa hapon, tulo ka tawo ang napaso, naglakip sa dos anyos nga bata, tungod sa pagbuto sa butane canister sa Sityo Cadiz Upper Tingub, siyudad sa Mandaue.

Ang mga biktima mao si Jonel Alburo, 30, minyo ug ang iyang manghod nga si Junie 19, ug ang anak ni Jonel nga usa ka dos anyos nga batang lalaki.

Matod pa, ang pamilya nag­hikay sa ilang panihapon dihang kalit nibuto ang gigamit sa pagluto nga butane canister.

Sa pakighinabi sa Superbalita Cebu kang Christo Astillero, usa sa responders sa Tingub Emergency Rescue Unit, nasuta nga ang managsuong Jonel ug Junie mao ang nagrabihan ug gidala sa Vicente Sotto Memorial Medical Center (VSMMC) sa siyudad sa Sugbo.

Ang dos anyos nga batang lalaki ang nakagawas usab dayon sa usa ka ospital sa Mandaue nga una gidad-an duha ka mga hamtong nga biktima.

Ang awtoridad nagpadayon pa sa imbestigasyon sa maong kaso. Ang pagbuto sa butane canister gitumbok usab sa mga bombero nga hinungdan sa pipila ka kaso sa sunog sa Sugbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph