Tulo ang nangamatay ug 11 ang nangaangol sa managlahi nga mga aksidente sa motorsiklo sulod sa duha ka adlaw sa lalawigan sa Sugbo.
Unang aksidente nahitabo sa national highway sa Brgy. Banhigan, Badian, Sugbo alas 12 sa udto Abril 26, 2024.
Lima ang nangaangol nga nangalandig sa Badian District Hospital human ang mga batan-on naglumbaanay sakay sa ilang mga motorsiklo, nakabangga sa laing motorsiklo.
Ang mga nangaangol mao sila si Jecko Del Mundo Handumon, 19, ulitawo, way driver’s license, ug ang iyang mga angkas nga sila si Christian, 16, ug Henrick, 15, puro taga Sanlagan, Badian.
Ang laing nangaangol mao ang magtiayong Jeanette Lisondra, 45, nagmaniho sa motorsiklo, may driver’s license ug ang iyang bana nga angkas nga si Richard Lisondra, 50, taga Banhigan, Badian.
Base sa imbestigasyon ni P/Staff Sgt. Johnrey C. Dusal, ubos sa kamanduan sa ilang hepe nga si Police Capt. Jerwin Mark C. Battung, nahibaw-an nga nga si Handumon nagduwa sa karsada nga nagmaniho sa motorsiklo gikan sa usa ka fiesta sa barangay.
Upat silang nagmotorsiklo nga naglumbaanay sa highway.
Sa dihang ni-overtake si Handumon sa nag-una kaniya, didto na nikawat sa lane nga gisubayan sa magtiayong Lisondra nga niresulta sa pagdinasmagay.
Ikaduha nga aksidente sa panagbangga sa duha ka mga motorsiklo nahitabo sa brgy. road sa Brgy. Lawaan, Alcantara mga alas 12 sa udto sa Abril 26, 2024.
Ang mga nangaangol mao sila si Marjon Jakosalem, 22, ulitawo, 3rd year college, taga Brgy. Manga, Alcantara samtang ang ikaduha giila nga si Junrex, 16, taga Brgy. Cabadiangan, Alcantara.
Ang wala nga tiil ni Jakosalem nagupok samtang ang wala nga kamot ni Junrex nagupok sab.
Si P/Sr. M/Sgt. Richard Cababat, traffic police investigator sa Alcantara Municipal Police Station, niingon nga si Junrex gikan sa inom sa iyang mga barkada ug mopauli na nga nagmaniho sa iyang motorsiklo.
Pag-abot niini sa brgy. road sa Lawaan, nisimang kini sa lane nga gisubay ni Jakosalem nga nagdulhog kay moadto sa iyang eskwelahan.
Didto nahitabo ang pagdinasmagay sa duroha. Pulos sila nangalandig sa Badian District Hospital.
Ikatulo nga aksidente naglambigit usab sa motorsiklo sa national highway sa Brgy. Malhiao, Badian sa alas 9 sa gabii, Abril 26, 2024.
Ang naangol ang pedestrian nga si Lucina Jabagat, 66, minyo, taga Malhiao, Badian.
Ang ikaduhang naangol mao ang drayber sa motorsiklo nga si Rexter Cabras, 26 , ulitawo, taga Brgy. Dagatan, Badian.
Sa imbestigasyon ni Master Sgt. Joefrey Badilles,imbestigador, nasayran nga ang motorsiklo nitadlas padung sa habagatan.
Apan pag-abot sa maong dapit, wa nakamatikod si Cabras sa biktima nga nilabang sa karsada hinungdan nga nadasmagan.
Sa kakusog sa impact, sila puro naangol ug nalandig sa Badian District Hospital.
TCH
Samtang patay ang angkas nga babaye ug angol ang drayber sa laing aksidente sa motorsiklo sa alas 9:20 sa buntag sa Sabado, Abril 27, 2024 sa Transcentral Highway sa Brgy. Cansomoroy, Balamban.
Ang namatay giila nga si Elgie Alcano Bulfa, 29, dalaga, taga Happy Homes, Siyudad sa Talisay samtang naangol ang iyang kapuyo nga nagmaniho sa motorsiklo nga si Christian Kenneth Lucero Espinosa, 26, ulitawo, taga Pahina Central, Siyudad sa Sugbo.
Base sa interview sa Superbalita Cebu kang P/Lt. Col. Julius Garcia, hepe sa kapulisan sa Balamban Municipal Police Station, nasuta nga ang mga biktima gikan sa Siyudad sa Sugbo padulong sa kinapusoran sa Balamban.
Pag-bot sa dulhogon nga bahin sa TCH, si Espinosa wa na maka-control sa iyang motorsiklo ug nadasmag sa traffic signage sa daplin sa karsada.
Ang magkapuyo nalabay ug bisan og complete gear pa sila, sa kakusog sa impact sa pagkaparok ni Bulfa sa tubo, nabuak ang iyang helmet.
Ang duha gidala sa Balamban District Hospital apan si Bulfa patay nang niabot tungod sa grabeng naangkong kadaut sa ulo.
Ang ikalima nga aksidente nahitabo alas 12 sa udto sa Sabado sa Brgy. Casay, Dalaguete.
Ang biktima giila nga si Dante Gibolingo, 56 , minyo, taga Balisong, Argao.
Sa imbestigasyon ni PSSgt. Gerzon Alcantara, nasuta nga ang biktima mopauli sa ilaha ug aksidente nga naigo sa dakong fish carrier nga padong sa habagatan nga gimaniho ni Alfredo Sardido, 54 , minyo, taga Sta. Maria, Zamboanga City.
Ang biktima gidali sa pagdala sa Bogo Argao District Hospital ug na-amicable settlement ra sa duha ka mga habig.
Samtang sa ikaunom nga aksidente, duha ang patay sa dinasmagay sa duha ka mga motorsiklo alas 6 sa gabii sa Sabado, sa national highway sa Brgy Tubod, lungsod sa Barili.
Namatay ang drayber sa Honda XRM nga motorsiklo nga si Regin Tablezo Lañojan, 46, minyo,taga Brgy. Tangil, lungsod sa Dumanjug, Sugbo.
Ang ikaduha nga namatay mao ang nagmaniho sa Honda CFT 125 nga si Ricky De Gracia Cuadero, 39 , minyo, taga Brgy. Pancil, Barili.
Base sa imbistigasyon ni PMSG Gilbert V. Engcabo nasayran sa Superbalita Cebu nga si Lañojan gikan sa ilaha padong sa Poblacion, Barili samtang si Cuedero gikasugat ni Lañojan.
Wa na makakontrolar sa iyang motorsiklo si Cuedero nga niresulta nga nikawat sa lane nga gisubayan ni Lañojan nga nisangko sa pagdinasmagay.
Ang mga biktima gidali sa pagdala sa Barili District Hospital apan pulos na patay pag-abot.