Tulo ang nangamatay samtang siyam ang mga nangaangol sa managlahing mga aksidente sa kadalanan sa Sugbo gikan sa Disyembre 25-26.
Kasagaran sa mga aksidente naglambigit og motorsiklo.
Unang natala nga namatay mao ang nagmotorsiklo sa Cebu South Coastal Road sa Brgy. Cansojong, siyudad sa Talisay sa alas 5 sa buntag sa Lunes, Disyembre 25, 2023.
Ang biktima giila nga si Lyndon Lapuz ,43, minyo, construction worker, taga Brgy. Tinaan, Siyudad sa Naga.
Sa pasiunang imbestigasyon sa City of Talisay Traffic Operations and Development Authority (CT-TODA) ,si Lapuz gikan sa siyudad sa Danao padung mopauli sa Tinaan, Naga.
Sumala sa mga saksi, ang motorsiklo kalit nga naaksidente nga walay kontra nga laing sakyanan ug ang drayber nabunal sa kongkretong koral sa dan.
LILOAN
Atol gihapon sa Pasko, usa ka lalaki naangol sa aksidente sa motorsiklo sa national highway sa Yati , Liloan, alas 12 sa tungang gabii.
Ang biktima nga usa ka computer programmer giila nga si Romil Labiaga, 25, ulitawo, taga Sityo Pilapil , Brgy. Casuntingan, siyudad sa Mandaue.
Sa imbestigasyon sa traffic police sa Liloan, nasuta nga ang biktima padulong sa kinapusoran sa lungsod apan sa kalit lang may tricycle nga niliko sa eskina sa bag-ong dan nga niresulta sa pagkabangga.
Way naunsa habig sa tricycle samtang si Labiaga nakaangkon og grabing kadaut sa lawas, nalandig sa tambalanan.
AKSIDENTE SA BRIDGE
Namatay ang usa ka drayber sa habalhabal human sila nadasmagan sa usa ka sports utility vehicle (SUV) sa unang Mactan bridge alas 7 sa buntag sa Lunes, Disyembre 25, 2023.
Sa inisyal nga imbestigasyon sa Lapu Lapu City Police Office (LLCPO), si Joselito Diaz Patalinghug, 70, uban sa iyang pasahero nga si Jay Anunsa-on nagsubay sa taytayan samtang nagpadulong sa Mandaue City.
Si Pol. Lt. Col. Christian Torres, hepe sa City Investigation and Detection Management Unit (CIDMU) ug LLCPO spokesperson, niingon nga ang SUV nga gimaneho ni John Mark Argabio giingong ni-counter flow sa taytayan paingon sa Maximo V. Patalinghug Jr. Avenue sa Barangay Pajo sa Lapu-Lapu.
Si Torres niingon nga ang impact maoy hinungdan nga ang ulo ni Patalinghug naigo sa windshield sa SUV.
Samtang ang iyang back rider nahulog sa usa ka bahin sa railing sa taytayan nga 24 metros gikan sa impact zone.
Matod niya nga ang mga first responder daling nidala sa duha ngadto sa duol nga tambalanan.
Apan tungod sa grabeng samad sa ulo ni Patalinghug, nakabsan siya sa kinabuhi. Si Anunsaon naa sa stable nga kondisyon.
MEDELLIN
Samtang, laing aksidente nga naglambigit og motorsiklo ug bus nahitabo sa ala 1:56 sa kaadlawon sa Martes, Disyembre 26, 2023, sa provincial road sa Sityo Masi, Brgy. Luy-a, lungsod sa Medellin, amihanang Sugbo.
Patay ang nagmaneho sa motorsiklo nga si Mark Ariel Baterna, 31, ulitawo, taga Sityo Paradise, Brgy. Poblacion, Medellin.
Sa imbestigasyon sa kapulisan sa Medellin nasayran nga ang motorsiklo gikadasmagay sa Sugbo Transit bus nga gimaniho ni Rommel Pepito, 42, minyo, taga Sityo Mangga, Brgy. Jugan, lungsod sa Consolacion.
Ang bus nidasmag usab ngadto sa usa ka appliance shop sa dapit.
DALAGUETE
Sa Sityo Poo, Barangay Balud, Lungsod sa Dalaguete , alas 4:00 sa kaadlawon, Martes, Disyembre 26, 2023, nadisgrasya ang usa ka Toyota Hi-Ace Grandia nga gimaniho ni Bermido Ganisao, 35, minyo, taga lalawigan sa Lanao del Norte.
Sa imbestigasyon sa kapulisan sa Dalaguete police, nasuta nga mga local tourist ang sakay sa giabangan nga van gikan sa syudad sa Lapu-Lapu ug padulong sa Tan-awan, lungsod sa Oslob alang sa whale shark watching.
Matod sa kapulisan, nasuta sa ilang imbestigasyon nga nakatagpilaw ang drayber.
Ang van dunay sakay nga unom ka mga tawo, usa niini bata apan di grabe.