3 patay sa 2 ka aksidente

GIDARO: Wa na mahitsura ang likod sa usa ka awto samtang patay ang usa ka lalaki nga nagmaneho og motorsiklo human sila gipangdaro sa usa ka trak sa Sabado pasado alas 11 sa buntag, Disyembre 16, sa Upper, Calajoan, Minglanilla. /TAMPO
GIDARO: Wa na mahitsura ang likod sa usa ka awto samtang patay ang usa ka lalaki nga nagmaneho og motorsiklo human sila gipangdaro sa usa ka trak sa Sabado pasado alas 11 sa buntag, Disyembre 16, sa Upper, Calajoan, Minglanilla. /TAMPO
NAKABANGGA: Mao kini ang delivery truck nga nidaro sa mga sakyanan samtang nagtadlas sa Calajoan, Minglanilla, nga nipatay sa usa ka tawo. / LYNDON YBARRETA
NAKABANGGA: Mao kini ang delivery truck nga nidaro sa mga sakyanan samtang nagtadlas sa Calajoan, Minglanilla, nga nipatay sa usa ka tawo. / LYNDON YBARRETA

Tulo ang nangamatay sa managlahing mga aksidente sa sakyanan sa lalawigan sa Sugbo.

Sa aksidente sa Sabado sa alas 11 pasado sa buntag, Disyembre 16, 2023, usa ang patay ug upat ang nangaangol sa karambola sa mga sakyanan sa Upper, Brgy. Calajoan, lungsod sa Minglanilla.

Usa ka forward truck ang nidaro sa mga sakyanan.

Ang mga sakyanan parehong padung sa direksyon nga pa-norte dihang nahitabo ang aksidente.

Ang Forward truck nga gimaneho ni Ruel Malabago Pedrita, 40, minyo, ulitawo, taga Brgy. Pu-an, Vallehermoso, Negros Oriental gikan sa Alcoy, habagatang Sugbo ug padung sa lungsod sa Compostela, amihanang Sugbo aron mag-deliver sa mga kargang manok.

Sa kalit lang, nadaro ni Pedrita ang duha ka mga nagmotorsiklo, usa ka awto ug laing sedan.

Si Ian Edsel Barangan, 40, taga Purok 1, Seaside North Poblacion, Siyudad sa Naga, nga nagmaneho sa iyang motorsiklo namatay diha-diha. Siya giila pinaagi sa mga identification card.

Si Barangan adunay angkas nga pasahero, kinsa luwas ra hinuon kay gamay ra ang mga samad.

Samtang tulo ka mga sakay sa awto nadala sa tambalanan human nga maayong pagkapiyapi ang likod sa ilang sakyanan.

Ang tulo giilang sila si Arvin Branzuela Agravante, 43, minyo, taga Garden Bloom, Brgy. Upper Pakigne, Minglanilla; iyang asawa nga si Rose Maxine Agravante, 41; ug Jaime Flores Insik, 58, minyo, taga Boloc Boloc, Barili, Sugbo.

Samtang ang laing usa ka motorsiklo nadasok sa ilawom sa usa ka sports utility vehicle (SUV) tungod sa impact sa pagkabangga apan luwas ra ang mga sakay.

Ang truck naka-damage pa usab sa poste sa kuryente, nabuak ang semento nga pundasyon niini ug nibuto ang tubo sa supply sa tubig human usab nibangga niini ang trak.

Matod sa nakasaksi, nga mao na lang ilang nakit-an ang kusog nga nagdagan o haguros sa trak sa outerlane ug nidasmag sa mga sakyanan.

Apan pangangkon nila ni Pedrita ug pahinante niini nga hinay ang ilang padagan, apan, matod pa, sa pag-abot sa dulhugong bahin, nikusog ang dagan ug wa na ni-function ang brake sa sakyanan.

Apan matod ni Glenn Antigua, pangulo sa Minglanilla Traffic Command (MITCOM) nga kanunay na nga gireklamo ang maong klase sa mga trak.

Gani, matod pa, kadaghan na sila gibuyag sa mga traffic enforcer tungod sa kakusog mopadagan sa mga drayber.

Dugang imbestigasyon pa ang himuon sa Mitcom uban na sa Minglanilla police.

Ang mga sakyanan nga nangadaut naglangkob sa duha ka Mitsubishi Mirage, usa ka Mitsubishi Montero, duha ka mga motorsiklo ug tulo ka delivery vans.

Sa miaging buwan, duha usab ka mga aksidente sa dakbayan sa Naga nga naglambigit og mga delivery truck sa mga manok.

Usa sa mga aksidente nakapatay og duha ka mga tawo.

Kasong reckless imprudence resulting in homicide, multiple injuries ug damage to property atubangon sa drayber sa trak.

CONSOLACION

Duha ka mga teenager, babaye ug lalaki, nangamatay samtang upat nila ka mga kauban nangaangol dihang ilang gisakyan nga motorsiklo sa pagpanuroy nabangga sa usa ka kahoy sa Biyernes sa gabii, Disyembre 15.

Nahitabo ang aksidente alas 7 sa gabii sa brgy. road sa Garing, bukiran sa Consolacion.

Ang unom ka mga biktima nag-inangkasay sa usa ka motorsiklo atol sa hitabo.

Ang nangamatay mao sila si Almaveth Marquez,18, ulitawo, taga Brgy. Yati, Liloan, kinsa nagmaneho sa motorsiklo ug si Jasmin Alarde, 16, taga Barangay Pulpogan.

Samtang ang mga nangaangol nga mga angkas mao sila si Lovely Mae Comiso,18, taga Barangay Tolo-Tolo sa mao nga lungsod; Janel, 16; Arqueiles, 16; ug Loel ,16, pulos taga Brgy. Polpogan.

Sa interview sa Superbalita Cebu kang Police Staff Sgt. Roel Aquino, investigator on case, siya nibutyag nga gikan ang mga biktima sa ilang Christmas party sa Polpogan National High School,

Sila nagkasinabot nga manuroy sa Brgy. Garing nga nag-inangkasay sa usa ka motorsiklo nga gimaniho ni Marquez.

Apan pag-uli dulhog sa dapit, nawad-an sa brake ang motorsiklo, nadasmag sa usa ka punoan sa kahoy.

Matod ni Aquino nga sa iyang tan-aw sa sitywasyon, hayan gipili na lang ni Marquez nga mabangga kay sa mahagbong sila sa lawom nga pangpang.

Ang mga biktima gidali sa pagdala sa mga sakop sa Municipal Disaster Risk Reduction and Management Office (MDRRMO) sa Eversly Childs Sanitarium and General Hospital sa dakbayan sa Mandaue apan patay nang niabot sila si Marquez ug Alarde.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph