Tulo ang nakalas sa managlahi nga aksidente sa kadalanan sa Dakbayan sa Sugbo, Mandaue ug sa Bogo sa kaadlawon sa Sabado, Agusto 16, 2025.
Nakabsan sa kinabuhi ang usa ka 26 anyos nga babayeng rider human giingong nibangga ang gimaneho nga motorsiklo ngadto sa usa ka delivery van mga alas 4:00 pasado sa kaadlawn Agusto 16, sa may Lopez Jaena St., Barangay Subangdaku, Dakbayan sa Mandaue.
Nakaangkon og dakong kadaot sa ulo ug sa ubang parte sa kalawasan si Ritchel Marie M. Panonce nga residente sa Purok Ilang-ilang, Barangay Opao.
Sa imbestigasyon sa kapulisan sa Mandaue, nasayran nga ang duha ka nalambigit nagbiyahe sa managlahing direksyon.
Napasok si Ritchel sa ilawom sa sakyanan nga niresulta sa iyang kamatayon.
Samtang patay usab ang 31 anyos nga lalaki human nadisgrasya sa iyang Yamaha Sniper nga motorsiklo alas 4:05 sa kaadlawon, Sabado, Agusto 16, 2025 sa Governor M. Cuenco Avenue sa Barangay Apas.
Ang biktima giila nga si Philip John Canillo Remedio, 31, residente sa Barangay Cabancalan sa Siyudad sa Mandaue.
Sa imbestigasyon sa Traffic Enforcement Unit sa Cebu City Police Office nasuta nga samtang nagmaneho sa iyang motor ang biktima paingon sa amihanang bahin kalit lang kini nga nalamba nga walay kontra.
Nakita nalang sa pump boy sa usa ka gasoline station nga nagbuy-od na ang driver ug nabuwag sa iyang motorsiklo pipila ka metros.
Tungod sa kakusog sa impact nakaangkon og dakong kadaot sa ulo ang biktima ug dali siya nga gidala sa Cebu City Medical Center apan nakabsan gyud kini sa kinabuhi.
Sa National Highway sa Barangay Lapaz sa Siyudad sa Bogo kalit nga natumba ang gimanehong motorsiklo nga sakay sa duha ka pasahero alas 5:20 sa buntag sa |Sabado.
Ang biktima nga patay na nga nadangat sa Cebu Provincial Hospital sa Bogo giila nga si Elmer Tamboboy Naraja, taga Lungsod sa San Remigio, Probinsya sa Sugbo.
Sa imbestigasyon sa Bogo City Police Station nga nag maneho ang biktima sa iyang itom nga Honda motorcycle paingon sa habagatang bahin ug angkas niya ang usa ka lalaki nga si Elvez Boy Cataraja, taga Barangay Gaway-Gaway, San Remigio.
Pag-abot sa Barangay Lapaz sa kurbadahon nga bahin kalit lang kini nga nasarasay ug dayong katumba ug nabagnos sa sementado nga karsada.
Nalagpot ang angkas sa biktima samtang siya napunta sa laing lane sa karsada nga naatol usab nga nakasugat niini ang Toyota Vios nga dunay plate number GAH 2387nga gimaneho ni Christopher Salidaga Orbiso, 45, nga residente sa Barangay Kawit, Lungsod sa Medellin.
Gidali pagdala si Naraja sa tambalanan apan gideklarar siya nga dead on arrival ni Dr. Edelisa Juntilla ang attending physician sa Cebu Provincial Hospital.
Gikustodiya sa kapulisan ang driver nga si Orbiso ug pasakaan og kaso./ JDG, AYB