Tulo ang nangamatay, duha kanila menor de edad, sa duha ka managlahing mga aksidente sa sakyanan sa Lunes ug Martes sa lalawigan sa Sugbo.
Motorsiklo nga gimaneho sa 17 anyos nga lalaki nga dunay angkas nga 17 anyos nga babaye nibangga sa gikasugat nga Ceres Bus sa kurbadahon nga dalan sa Barangay Poblacion, lungsod sa Argao, habagatang Sugbo sa alas 6:30 sa buntag sa Martes, Abril 16.
Gituohan nga nagdali sa pagpa-uli ang duha ka menor de edad kay nabuntagan sa ilang pagpanglaag hinungdan nga nagpakusog sa pagpadagan ang driver nga menor nga lalaki.
Ang mga biktima giila nga sila si John Paul Camarillo, 17, drayber sa Rusi motorcycle, taga-Sityo Maliningo, Barangay Lamacan, Argao ug si Rica Rose Villagonzalo, 17, backrider, taga-Sua, Argao.
Samtang ang drayber sa Ceres bus mao si John Mark Talam, 40, ulitawo, taga-Barangay Sibucao, San Enrique, Negros Occidental.
Sa imbestigasyon sa Argao Municipal Police Station nasuta nga ang motorsiklo nga way plate number nga gisakyan sa mga biktima nagsubay sa national highway sa Poblacion, Argao nga paingon sa habagatan.
Samtang padulong sa Cebu City ang bus gikan sa lungsod sa Oslob, habagatang Sugbo.
Ang motorsiklo ni-overshoot sa pikas lane sa kurbadahun nga portion sa dan hinungdan nga nabangga sa gikasugat nga Ceres bus.
Ang mga biktima nalabay ug nabunal sa sementado nga kalsada samtang naligsan pa sa bus si Camarillo ug naguroy og pipila ka metros base sa mga pat-ak sa dugo.
Bisan wa nay panimuot, ang duha gidali sa pagdala sa labing duol nga tambalanan apan gideklarar sa doktor nga dead-on-arrival (DOA).
Sa exclusive interview sa Superbalita Cebu kang Talam, siya nibutyag nga puno siya sa mga pasahero nga gikan sa Bato, Oslob ug paingon dakbayan sa Sugbo.
Paghiabot sa kurbahon nga bahin sa maong karsada, nipahinay siya og padagan nga moabot lang sa 40 kph.
Nakurat si Talam nga adunay nisugat kaniya nga motorsiklo nga nikawat sa iyang lane hangtod nga sila nabangga.
Nahinabi sab ning mantalaan ang inahan ni Villagonzalo nga si Emely Villagonzalo nga niadtong sa Lunes sa gabii, Abril 15, gikuha ang iyang anak ni Camarillo nga way pananghid.
Giingong aduna pa kiniy laing kuyog nga mga batan-on apan wa sila masayod kon diin gikan nga nabuntagan. Ang mga tagtungod sa nangamatay nakig-areglo sa management sa Ceres bus.
NALIMBUWAD
Milanat ngadto sa lima ka oras una naugkat ang lawas sa truck helper sa dihang napiit sa nalimbuwad nga trak de karga human nahulog sa pangpang sa national highway sa Purok Kabulakan, Barangay Libjo, Lungsod sa Tabogon, amihanang Sugbo sa mga alas 11 pasadosa gabii, Abril 15, 2024 .
Ang namatay mao si Rodulfo Boquia, 35, samtang naangol ang truck driver nga si Velmar Deloyola, 42, minyo, pulos taga Barangay Canduman, Siyudad sa Mandaue.
Sa pakighinabi sa Superbalita Cebu kang Patrolman Clemente Lobedica, traffic police investigator sa Tabogon Municipal Police Station, nasayran nga si Deloyola gikan sa Mandaue City, nagmaneho sa wing van nga 10-wheeler nga adunay karga nga limestone nga ihatod paingon sa isla sa Bantayan, amihanang Sugbo
Sa dihang nagsubay sa dulhogon ug kurbadahon nga bahin sa dapit, kalit kini nawad-an og brake ug wa na makontrolar ang sakyanan hangtod nilahos sa pangpang.
Ang drayber nadala sa mga sakop sa Tabogon rescue team ngadto sa Bogo City Cebu Provincial Hospital ug anaa na sa luwas nga kahimtang apan ang helper alas 4 na sa kaadlawon sa Martes naugkat ug patay na. /