Tulo ka mga lalake nga naatlan sa mga sakop sa Regional Highway Patrol Group (HPG 7) nga nagtuklod og motor nga ilang gikawat gipangsikop sa may dan Menciano, Barangay Taclobo, Siyudad sa Dumaguete sa probinsya sa Negros Oriental sa miaging semana.
Ang tulo nga naposasan giila sa mga alyas nga Lorenz, taga Barangay Buntis, lungsod sa Bacong, alyas Ron ug alyas JC, pulos taga Dumaguete.
Matud ni Police Lieutenant Colonel Wilbert Parilla, ang hepe sa HPG 7, nga unang nagpatabang sa kapulisan sa Siyudad sa Dumaguete si alyas Jocelyn nga gikawat ang iyang motorsiklo.
Matud ni ni Jocelyn, residente sa Barangay Lower Bagacay sa maong dakbayan, nga iyang nabantayan nga nawagtang lang og kalit ang motorsiklo nga gi-parking sa gawas sa ilang panimalay.
Dali nga gipa alarma sa Dumaguete City Police Station ang maong insidente ug gipahibawo nila ang HPG-Negros Oriental nga miresponde usab dayon.
Sa paglibot sa mga sakop sa HPG 7 ilang naabtan ang tulo sa Menciano Road nga nagtukmod sa motorsiklo nga mitakdo sa gihulagway sa biktima nga tungod ani ila kining gidakop.
Napasakaan na og kasong carnapping ang tulo ka mga suspek sa Dumaguete City Prosecutor’s Office. / AYB