Tulo ka lalaki ang naposasan sa mga operatiba sa Philippine Drug Enforcement Agency (PDEA 7), uban sa Mandaue City Police Office Station 2, atol sa pag ronda sa usa ka drug den nga nahimutang sa Sitio Eusibio, Barangay Subangdaku, alas 9:15 sa gabii, Sabado, Hunyo 14, 2025.
Usa sa mga nadakpan ang ilang target nga maoy nagpadagan sa drug den nga giila sa alyas nga Jay-R, 37, residente sa maong lugar.
Si Jay-R nadakpan na niadtong 2013 sa kaso gihapon sa illegal nga drugas apan nakagawas pinaagi sa plea bargaining agreement.
Lakip sa nadakpan ang duha ka lalaki nga silang alyas Alquen, 45, nga nadakpan na usab niadtong 2015 ug nakagawas pinaagi sa probation, ug alyas Robert, 21, nga giila nga bag-ong drug personality.
Ang tulo pulos nagpuyo sa Barangay Subangdaku sa siyudad sa Mandaue.
Nakuha sa mga operatiba ang 16 ka pakete sa gituohang shabu nga motimbang sa 16 gramos nga dunay estimated average market value nga P108,800, 4 ka putos nga dunay residue sa gituohang shabu, buy bust money ug nagkadaiyang drug paraphernalia.
Ang mga nakuhang ebidensya giduso na sa PDEA 7 Regional Office Laboratory alang sa chemical analysis.
Matud ni Leia Alcantara, information officer sa PDEA 7, nga duha ka semana nila nga gipaubos sa case buildup ang maong drug den human sila makadawat ang impormasyon gikan sa ilang kasaligang tinubdan.
Kasong kalapasan sa Section 5, 6, 7, 11 ug 12, Article II sa Republic Act 9165 ang ipasaka nga kaso sa PDEA 7 batok sa maong mga dinakpan. / AYB