Mga duwa karon:
5:00 P.M Northport Batang Pier batok San Miguel Beermen
7:30 P.M Rain or Shine Elasto Painters batok Ginebra Gin Kings
Init nga aksiyon ang gilauman sa pinakauwahi nga duwa sa elimination round sa panagtagbo sa Barangay Ginebra Gin Kings ug Rain or Shine Elasto Painters sa Philippine Basketball Association (PBA) Philippine Cup karong Dominggo, Hunyo 15, 2025, sa Ynares Sports Center sa Antipolo.
Ang fan-favorite nga Gin Kings ug ang E-Painters magsangka sa main game alas 7:30 sa gabii, diin nagtinguha ang Gin Kings nga makuha ang luna sa Magic Four nga adunay lakip nga twice-to-beat advanatage sa quarterfinals.
Para sa Rain or Shine, ang kadaugan mahimong ilang tsansa nga makasulod sa Top Four pinaagi sa quotient tiebreak sa posibleng triple tie-up.
Ang NLEX ug Magnolia pa ang lig-on nga nakapwesto sa top 4, parehong naghupot og 8-3 (win-loss) record.
Sa laing habig, ang San Miguel Beer (7-3) ponterya pud ang Top 4 slot sa ilang pakigbatok sa NorthPort Batang Pier sa first game alas 5 sa hapon.
Kon makadaog ang San Miguel ug Ginebra, klaro na ang top four ang NLEX, Magnolia, San Miguel ug Ginebra.
Kon makadaog ang Rain or Shine, moabot pa og quotient system. Mahimong magkab-ot og triple tie sa 7-4 record tali sa Rain or Shine, Ginebra, ug Converge FiberXers.
Nakasaka sa ilang kasamtangang posisyon ang Ginebra human og sunodsunod nga kadaugan kontra Magnolia (85-81) ug TNT (97-78). / RSC