Gibanabana sa kabomberohan nga moabot sa kapin sa tunga sa milyon ka pesos ang danyos sa pagkasunog sa 30 ka mga panimalay sa dalan B. Suico, Upper Tingub, Siyudad sa Mandaue, alas 8:02 sa gabii, Sabado, Pebrero 3, 2024.
Sa imbestigasyon sa kabomberohan sa dakbayan sa Mandaue ubos sa ilang pangulo nga si Supt. Arnel Abella, nasayran sa Superbalita Cebu nga ang sunog nagsugod sa balay sa usa ka Sammy Benigay ug daling nikatap sa silingang kabalayan.
Sa maong hitabo, 44 ka pamilya ang naapektohan nga gilangkoban sa 134 ka mga indibiduwal.
Ang sunog giisa sa kabomberohan sa 2nd alarm. Way naangol sa maong hitabo.
Atol sa pagkuha ning taho, nagpadayon pa ang imbestigasyon bahin sa sinugdanan sa pag-ulbo sa kayo.