Mokabat na sa 30 ang patay, 10 ang samdan, ug pito ang nagpabiling missing tungod sa kadaot nga dala sa mga nangaging mga bagyo ug tungod sa habagat, matod sa National Disaster Risk Reduction and Management Council (NDRRMC) niadtong Sabado, Hulyo 26, 2025.
Ang mga Bagyong Crising, Dante, ug Emong nagdala og usa ka semana nga kusog nga hangin ug kusog nga pag-uwan sa wala pa mogawas sa Philippine Area of Responsibility, apan ang habagat padayon nga naghuros sa daghang bahin sa nasod.
Ang National Capital Region ang nakatala sa pinakataas nga gidaghanon sa mga kumpirmadong namatay nga adunay siyam nga namatay, gisundan sa Central Luzon nga adunay duha, ug Northern Mindanao ug Caraga nga adunay tagsa.
Mokabat 17 sab ka mga patay ang padayon pa karon gisuta, lakip ang mga taho gikan sa Calabarzon (4), Mimaropa (1), Western Visayas (6), Negros Island Region (3), Northern Mindanao (2), ug Davao Region (1).
Sa kinatibuk-an, 1,460,986 ka pamilya o 5,299,299 ka indibidwal ang apektado. Niini nga datus, 57,555 ka pamilya o 201,032 ka tawo ang natabangan sa 1,783 evacuation centers, samtang 29,502 ka pamilya o 109,579 ka tawo ang nakadawat og hinabang gawas sa evacuation centers.
Nakatala sab ang Department of Agriculture og dakong kadaot sa agrikultura, diin gibanabana nga mokabat sa P484,400,244.10 ang kantidad niini.
Ang kadaot nakaapekto sa 19,662 ka mga mananagat ug 19,086.09 ka ektarya sa mga pananom nga miresulta sa pagkadaot sa 14,313.71 metriko tonelada nga produksiyon.
Ang National Irrigation Administration nitaho usab og P281,660,000 nga kantidad sa kadaot sa mga pasilidad sa irigasyon.
Gibanabana nga P5,005,253,046.08 ang danyos nga natala sa imprastraktura sa tibuok Ilocos Region, Cagayan Valley, Cordillera Administrative Region, Central Luzon, Calabarzon, Mimaropa, Western Visayas, ug Northern Mindanao.
Adunay kinatibuk-ang 154 ka mga siyudad ug lungsod ang gipaubos sa state of calamity. Samtang, 2,784 ka mga pamilya o 7,918 ka mga indibidwal ang preemptively evacuated isip safety measure.
Si Presidente Ferdinand “Bongbong” Marcos Jr. una nang niingon nga iyang gimandoan ang mga ahensya sa gobyerno nga unahon ang kaluwasan sa publiko ug paspasan ang paghatod sa mga hinabang sa mga naapektuhan sa pagbaha sa Metro Manila ug ubang mga probinsya. / JGS