KAPIN sa 3,000 ka mga ri-der ang nilusad og caravan Biyernes sa hapon, Mayo 9, 2025 sa Dakbayan sa Mandaue isip pagpakitag suporta sa mga kandidato sa One Mandaue.
Si Ariel Bihag, ang president sa One Mandaue Riders nibutyag nga ang One Mandaue nga mga kandidato sa pagpanguna ni mayoral candidate nga si Jonkie Ouano ug Kongresista Emmarie "Lolypop" Ouano-Dizon, mipakita og hugot nga suporta kanila.
Dugang niya nga ang mga riders nisuporta usab sa panglantaw ni Jonkie alang sa programa sa panglawas ug edukasyon ug nakasiguro sila nga ang makabenepisyo niini mao ang ilang tagsa-tagsa ka pamilya.
"Nindot man gyud ang mga plano ni Jonkie para sa Mandaue, maong kinasing-kasing gyud ning among pagkuyog niya," matod ni Bihag. / AYB