33 ka sports venue sa Palaro bantayan og kapulisan

33 ka sports venue sa Palaro bantayan og kapulisan
Amper Campana

Moabot ngadto sa 33 ka sports venue sa Palarong Pambansa 2024 hatagan og seguridad sa kapulisan gikan sa pagsugod niini sa Hulyo 9, 2024 hangtod matapos sa Hulyo 15, 2024.

Matod ni Police Colonel Ireneo Dalogdog, hepe sa Cebu City Police Office (CCPO), nga sa 33 ka mga venue, 30 niini naa sa Dakbayan sa Sugbo samtang ang tulo ipahigayon sa mga dakbayan sa Lapu-Lapu, Mandaue ug Talisay.

Aduna na usab silay listahan sa billeting area nga moabot ngadto sa 20 ka lugar sa dakbayan sa Sugbo nga maoy puy-an sa mga atleta gikan sa lainlaing rehiyon sa Pilipinas.

Nibana-bana ang kapulisan nga moabot ngadto sa 12,000 ka mga atleta ang mosalmot sa Palarong Pambansa samtang kapin sa 8,000 usab ang officials nga maoy modumala sa tanang paugnat sa kusog, lakip na niini ang mga kawani sa Department of Education.

Sa maong gidaghanon, wala pay labot ang mga kabanay sa mga atleta sama sa ilang ginikanan, igsuon ug uban pa nga mokuyog dinhi sa dakbayan sa Sugbo aron mosaksi sa ilang salmutan nga paugnat sa kusog.

Dugang ni Dalogdog nga sa pagkakaron nagpaabot pa sila sa dugang gidaghanon sa mga police personnel nga i-augment sa dakbayan sa Sugbo gikan sa mga silingang dapit sama sa Cebu Province, Negros Oriental ug Bohol.

Sa pagkakaron moabot ngadto sa 690 ka mga polis ang sigurado na nga mobantay sa Palaro, wala pay labot niini ang pwersa sa kasundaluhan nga nisaad nga magpadala usab og mga personnel ug force multipliers.

Nisaad hinuon si Police Brigadier General Anthony Aberin, hepe sa Police Regional Office 7, nga maoy overall security commander nga siya mopadala og mga personnel gikan sa Regional Mobile Force Battalion 7.

Sa Hunyo 28, 2024 ipahigayon sa CCPO ubos sa kamandoan ni Aberin ang send off ceremony sa South Road Properties ug pagka Hunyo 29, 2024 magsugod na ang deployment ug walk through sa venue.

Napanglantawan ni Dalogdog nga magsugod na sa pagpangabot ang mga delegado sa Hulyo 1-5 pa lang aron mo-inspection sa sports venue ug pagka Hulyo 6 dunay himuon nga orientation sa technical officials.

Ang opening ceremony hi­muon sa Hulyo 9 sa Cebu City Sports Center diin dunay parada gikan sa Fuente Osmeña.

Gipaniguro ni Dalogdog nga sa maong mga kalihukan sa Palarong Pambansa hugot nga seguridad ang ilang ipatuman.

Matod niya nga gawas sa mga polis nga naa gi deploy sa mga sports venue, ipakatap usab niya ang mga polis sa kadalanan nga mag beat patrol 24 oras aron maoy molutos sa mga kriminal nga mamiktima sa mga bisita.

Kon unsa ang ilang gihimo niadtong Central Visayas Regional Athletic Association meet, mao usab ang ilang buhaton karon sa Palarong Pambansa.

Samtang pagsugod pa lang sa deployment sa Hunyo 29, 2024 isaka na sa CCPO ang ilang alert status gikan sa normal ngadto sa full alert.

Wa nay gitugotan nga mga personnel nga maka leave sa ilang trabaho tungod kay atol sa maong dakong kalihukan daghang tag-as nga mga opisyal sa gobyerno ang mobisita sa Siyudad sa Sugbo sama kang Presidente Ferdinand Marcos Jr. ug Bise Presidente Sara Duterte.

Sa mga billeting area way outsiders nga makasulod sanglit tanang gitugotan nga mosulod lang kadtong dunay identification cards aron dili sila mabiktima sa mga kawatan. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph