Mga overweight nga polis sa Central Visayas magsugod na og paubos sa ilang timbang aron makuha ang 34 inches nga sukod sa ilang hawak.
Kini nunot sa kamandoan ni PNP Chief General Nicolas Torre III sa tanan niyang mga sakop nga kinahanglan nga dili dagko'g tiyan ug ilang sundon ang 34 inches nga sukod sa ilang hawak aron nga makadagan pa kini kun adunay gukdon nga kriminal.
Apan mihatag siya og exemption niadtong mga dagko ang bone structure diin dili na mahimong mogamay tungod sa ilang dako nga lawas.
Si Police Brigadier General Redrico Maranan, ang hepe sa Police Regional Office (PRO 7), nagkanayon nga daku siyang uyon sa kamandoan ni Torre aron nga ang tanang police physically fit kini.
Iyang gipasabot nga kinahanglan nga ang matag polis makadagan pa kini ug makagukod sa mga kriminal.
Dunay mga programa karon nga gihimo ang PRO 7 aron moubos ang timbang sa mga police sama sa pagpahigayon sa nagkalain-laing matang sa sports sama sa basketball, swimming bisan gani ang golf basta dili lang kini maka-apekto sa oras sa ilang trabaho.
Gihatagan og igong panahon ang matag police personnel nga mopagamay sa ilang hawak ug timbang sulod sa usa ka tuig ilabi na kadtong mga overweight ug obese nga gihulagway ni Maranan nga igo na kini nga panahon aron makuha nila ang ilang target. (AYB)