Gipadayag sa Philippine National Police (PNP) ang ilang hingpit nga kaandam aron maseguro ang kalinaw ug kahusay sa pagsugod sa klase alang sa School Year 2025-2026 karong Lunes, Hunyo 16, 2025.
Sa usa ka pamahayag niadtong Domingo, Hunyo 15, gibutyag sa PNP nga mokabat sa 37,740 ka police personnel ang ilang ipakatap sa tibuok nasod aron maseguro ang kaluwasan ug kaayuhan sa mga estudyante ug magtutudlo gikan sa 45,974 ka mga pampubliko ug pribadong mga eskwelahan.
Aron mas mapalig-on ang presensya sa kapulisan ug suporta sa komunidad, ang PNP magtukod og 5,079 ka Police Assistance Desks (PADs) duol sa mga tunghaan. Mokabat sa 10,759 ka mga polis ang ma-assign sa pagdumala niining PADs aron mohatag og suporta sa mga estudyante, ginikanan, ug staff sa eskwelahan.
Dugang pa, 10,687 ka mga opisyal ang ipakatap sa mobile patrols ug 16,366 sa foot patrols aron maseguro ang dugang nga police visibility sa mga lugar nga daghan og tawo ug delikado.
Sa regional units, ang Central Visayas Regional Police Office ang adunay kinatas-ang deployment nga moabot og 7,366 ka mga personahe, gisundan sa Bicol Region nga adunay 2,962, Eastern Visayas nga adunay 2,376, ug ang National Capital Region Police Office nga adunay 4,323. Sa Mindanao, ang Bangsamoro Autonomous Region Police mopakatap og 2,898 ka mga personahe alang sa 657 ka mga eskwelahan.
Si PNP chief Police General Nicolas Torre III nagkanayon nga makigtambayong ang iyang buhatan sa Department of Education (DepEd), local government units, ug ubang ahensya aron maseguro ang hapsay nga pagsugod sa klase.
“The safety of our students, teachers, and school staff remains our utmost priority. We want to ensure that our children return to school without fear or harm. Our police officers will be in every possible area to provide protection, guidance, and support,” matod ni Torre.
“Oplan Balik-Eskwela is not just a deployment plan; it is our expression of commitment to nurture an environment where learning can thrive peacefully. We will continue to stand guard for the Filipino youth, rain or shine.”
Isip kabahin sa mga preparasyon sa dili pa ang pagsugod sa klase, ang mga personahe sa PNP aktibo nga niapil sa Brigada Eskwela 2025, nitabang sa pagpanglimpyo, pag-ayo, ug pagpintal sa mga classroom ug sa tugkaran sa eskwelahan. Gipasabot sa PNP nga ang Balik-Eskwela preparatory phase sa tanang rehiyon gihulagway nga malinawon ug walay insidente.
Mahitungod sa kasamtangang isyu sa seguridad, ang PNP nagpagawas og hugot nga pasidaan batok sa drug peddlers ug mga grupo nga mosuway sa pag-recruit og mga estudyante alang sa mga militanteng organisasyon
Gigarantiyaha ni Torre nga kining mga hulga pagasulbaron dayon ug walay kompromiso.
Nanawagan ang PNP sa publiko nga magpabilin nga alerto ug -report dihadiha dayon ang bisan unsang kadudahan nga kalihukan ngadto sa labing duol nga estasyon sa kapulisan o pinaagi sa 24/7 hotlines sa PNP, isip kabahin sa ilang gipaambit nga responsibilidad aron maseguro ang luwas ug hapsay nga pag-abli sa klase. / TPM / SunStar Philippines