Nangulo si Congressman Junard “Ahong” Chan sa Lapu-Lapu City Lone District uban ni Mayor Cindi King-Chan sa pay-out sa binulan nga honorarium alang sa 38 ka Muslim nga magtutudlo niadtong Huwebes, Hulyo 10, sa Lapu-Lapu City Mayor’s Office.
Agig pag-ila sa ilang kontribusyon sa edukasyon sa siyudad, ang mga magtutudlo gikan sa mga pampublikong elementarya ug hayskul nga gihatagan og tag P2,000 matag usa.
Ang panagtapok nagsilbing oportunidad di lang sa pagtunol sa honorarium, apan usab alang sa mga Muslim nga magtutudlo nga ipadayag ang ilang mga kabalaka ug ideya alang sa pagpauswag sa mga pasilidad sa edukasyon.
Daghang mga magtutudlo gikan sa nagkalainlaing eskwelahan, lakip ang Basak Elementary School, Pajo National High School, ug Bankal National High School, ang nipaambit sa ilang mga sugyot atol sa miting.
Ang mga magtutudlo gikan sa Babag Elementary School ug Suba Masulog Elementary School nagpasalamat sa mga opisyales sa siyudad, ingon man sa ilang mga principal sa eskwelahan sa pagsiguro nga mapadayon ang ilang mga relihiyusong gimbuhaton.
Pipila ka magtutudlo ang nipadayag usab og pipila ka mga kabalaka bahin sa kakuwang sa classrooms.
Daghang eskwelahan ang nag-atubang sa huot nga mga classroom ug ang mga magtutudlo nagpatabang sa pagpangita og dugang mga lugar.
Usa ka magtutudlo gikan sa Bankal National High School, nga adunay daghang estudyante, nagkanayon nga bisan og gihatagan sila og kwarto sa miaging tuig apan gibawi ra gihapon.
Sa Poblacion Elementary School, usa ka magtutudlo nipasabot nga bisan og gihatagan sila og igo nga mga classroom, gusto usab nila nga mohangyo og dugang nga mga magtutudlo aron mas maayo nga ma-accommodate ang ilang mga estudyante.
Samtang giila sa mga magtutudlo ang mga hagit, gipadayag usab nila ang ilang pasalamat sa makanunayong suporta nga ilang nadawat gikan sa gobyerno ug mga tigdumala sa eskwelahan.
Usa ka representante sa grupo nipadayag sa ilang pasalamat sa panagtapok tungod kay nagsilbi kini nga agianan alang sa mga Muslim nga magtutudlo aron ipaila ang ilang kaugalingon ug ipahibalo ang ilang mga kabalaka sa Mayor ug Congressman.
Gituki ni Congressman Ahong ang importansya sa Arabic ug Islamic nga mga mithi sa mga pampublikong eskwelahan.
Gipasabot niya nga ang Arabic ug values education nagsilbing lig-on nga pundasyon alang sa pagpalambo sa kinaiya sa ilang mga estudyante.
Giasoy usab ni Chan ang makasaysayanong pag-angkon nga si Lapulapu mahimong adunay Muslim nga kagikan, ug tungod sa pagka-tourism hub sa siyudad, iyang gipunting ang nagkadaghang Muslim nga turista nga kanunay nangita og mga mosque kung mobisita.
Giawhag niya ang panaghiusa ug kooperasyon sa pagpresentar sa mga Muslim nga simbahan isip mahigalaon ug respetado.
Gipasaligan sa kongresista ang mga magtutudlo nga ang ilang mga kabalaka ipadangat sa mga opisyal sa Department of Education (DepEd) atol sa ilang courtesy call sa hapon.
Atol sa miting, si Mayor Cindi King-Chan nipadayag sa iyang pasalamat sa mga magtutudlo sa ilang kamatidun-anon pagtudlo sa siyudad.
Giila niya ang mga hagit nga giatubang sa mga Muslim nga magtutudlo ug gipasaligan sila nga ang ilang mga kabalaka sulbaron.
“Gusto ra gyud namo nga mo-improve, kay sa atong kinabuhi, mo-strive man gyud ta nga mo-improve,” matod ni Chan. / Frances Ibo, VSU Intern