39 ka mga sunog sa Cebu City sa Marso

Sunog
SunogFile Photo

Gipasidunggan sa Cebu City Fire Station ang mga fire brigade volunteer ug ubang stakeholders nga giila nga dako’g natampo sa pagpawong sa kayo atol sa pagtapos sa Fire Prevention Month ning tuiga sa Abril 1, 2024 nga adunay tema nga “Sa Pag-iwas sa Sunog, Hinda ka Nag-iisa.”

Sa data sa Cebu City Fire Office, sila nakatala og 39 ka alarma sa sunog sa tibuok Marso 2024, itandi sa 33 sa miaging tuig.

Apan matod pa ni Senior Fire Officer 2 Wendel Villanueva, information officer sa CCFO, nga bisan daghan sila og natubag nga alarma sa sunog karong tuiga, ubos ang danyos itandi sa miaging tuig.

Nakatala sila og P9.6 milyunes nga balor sa mga kabtangan nga hingpit nga nasunog karong tuiga itandi sa P11.6 milyunes sa miaging tuig.

Usa sa nakatampo kon nganong dili dako ang natala nga danyos tungod sa pagtinabangay ug pagpakabana sa publiko nga kon dunay motumaw nga sunog sila magtambayayong sa pagpawong sa kayo.

Sa 39 ka alarma sa sunog nga nahitabo sa siyudad, 20 porsyento niini napawong na ang kayo pag-abot sa mga bombero nga gitawag nila’g ‘fireout upon arrival’ nga nagpasabot nga diha pa lang sa mga residente, wala na makakatap ang kayo.

“Despite sa atoang grabeng kainit nga atong nasinati, atoa gyud napugngan ang grabeng sunog. So usa na sa successful nga pagpahigayon nato sa atong mga programa, atong gi-involve ang community,” matod ni Villanueva.

Dugang ni Villanueva nga ang nag-unang hinungdan sa pagtumaw sa sunog mao ang electrical ignition caused by arcing, adunay mga bata nga nagduwa og pusporo o lighter, lakip na ang wa mabantayi nga niluto.

Nakatala usab sila og 22 ka grass fire sa tibuok Marso diin ang hinungdan niini tungod sa kainit sa panahon ug pagpataka og daob ug labay sa upos sa sigarilyo. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph