Mokawat og dakong atensyon ang nanag-unang sports personalities sa Sugbo karong Sabado, Abril 26, 2025, sa pagpahigayon sa 39th SAC-SMB Cebu Sports Awards sa Cube Wing sa SM Seaside City Cebu Cube Wing.
Ang pretihiyusong kalihukan, nga giorganisar sa Sportswriters Association of Cebu (SAC) kaabag ang San Miguel Brewery, Inc., mohatag og pasidungog sa mga atleta, coaches, ug teams sa Sugbo sa nakab-ot niining kalampusan sa local ug international tournaments sa niaging tuig.
Mangulo sa mga pasidunggan mao si Jessica Jawad-Honoridez, kinsa bantugang personalidad sa Philippine table tennis ug athletic director of the University of Cebu (UC) Webmasters.
Tungod sa iyang wala’y puas nga pagsuporta sa grassroots sports pinaagi sa Jawad Cup-- nga naa na sa ika-33 ka mga tuig – ug sa iyang obligasyon isip commissioner sa Cebu City Sports Commission, si Jawad-Honoridez maoy napili alang sa Rico Navarro “Sportsman of the Year” award.
Hatagan sab og rekognasyon isip Orlacsan awardees sila si boxing trainer ug matchmaker Edito Villamor, grassroots basketball advocate Dee J.P. Villanueva, ug Carcar City Floorball Association.
Makadawat og major awards sila si 8-time PBA MVP June Mar Fajardo, world 9-ball champion Rubilen Amit, ug World Boxing Council (WBC) minimumweight champion Melvin Jerusalem.
Makig-uban nila sila si Olympians Elreen Ando, John Febuar Ceniza, ug Kiyomi Watanabe, gymnastics coach Allen Aldrin Castaneda, ug ang beteranong weightlifting mentors nga sila si Ramon Solis ug Christopher Bureros.
Modawat sab og major awards sila si weightlifters Fernando Agad, Althea Bacaro, ug Eron Borres, volleyball stars Sisi Rondina ug Thea Gagate, amputee triathlete Alex Silverio, jiu-jitsu world champions Ellise Xoe ug Eliecha Zoe Malilay, golfer Grace Quintanilla, chess prodigy Apple Rubin, SEA Games Vovinam gold medalist Janah Jade Ochea, skateboarding icon Margielyn Didal; all-female Esports team Smart Omega Empress, ug ang elite cyclists Jonel Carcueva ug Shagne Yaoyao.
Aduna sab ipanghatag nga citations.
Ang kalihukan, nga sugdan sa alas 3:00 sa hapon, moabli pinaagi sa welcome remarks gikan ni San Miguel Brewery Inc. Communications Manager Girlie J. Cruz Garces ug sundan kini og mensahe ni SAC President John Pages. / Pooled Report