Nalisang ang usa ka dalaga nga teller sa 3D lotto outlet sa dihang gitulis sa usa ka lalaki nga nagmaskara kay siya gitiunan og hunting knife alas 7:30 sa gabii sa Huwebes, Hulyo 18, 2024 .
Gitulis mao ang 3D lotto outlet sa Brgy. Langtad, lungsod sa Argao. Ang teller giila sa alyas nga “Sweet”, 23, taga Brgy. Langtad.
Matod pa nga ang biktima nagpaabot og mopusta sa Swertres sud sa booth dihang kalit lang may usa ka wa mailhing lalaki nga nagsul-ob og kolor grey nga jacket nga nagtaptap sa nawong ug t-shirt kolor puti nga nisulod ug nagdala og hunting knife.
Matod niini, “Kuwarta ug cellphone ra ako,Day. Kon mosiyagit ka, idunggab nako ning kutsilyo sa imong liog,” kutlo sa dalaga sa hulga sa tulisan base sa iyang asoy sa kapulisan.
Nakuha ang P3,000 nga halin ug ang nag-inusarang tulisan daling nisibat sakay sa usa ka motorsiklo ug wa na maabti sa mga polis sa Argao nga niresponde sa alarma.
Ang kapulisan sa Argao nagpadayon pa sa ilang imbestigasyon aron mailhan ang tulisan. / DVG