UPAT ang naangol human nagkabangga ang duha ka motorsiklo alas 5:45 sa hapon, Dominggo, Hulyo 20, 2025, sa national highway sa Barangay Arpili, Lungsod sa Balamban.
Ang naangol mao si Jemberson Guindo Mendoza, drayber sa motorsiklo nga nagtrabaho sa Global J and T Express nga taga Barangay Sangi, Dakbayan sa Toledo.
Naangol sab ang magtiayon nga sakay sa laing motorsiklo nga sila si Rennie Boy Roda, 59, iyang asawa Joselyn Roda, 56, ug apo nga si Ana Rose, 15, taga Barangay Buanoy, Balamban.
Si Police Lt. Col. Pedy Noval, hepe sa Balamban Police Station, nagkanayon nga padulong sa Dakbayan sa Toledo si Mendoza.
Sa pag-abot sa nahisgutang lugar, gikasugat niini si Roda gikan sa Dakbayan sa Toledo padulong mopauli sa Buanoy.
Pero si Roda matod pa nisimang sa pikas lane og mibangga ni Mendoza human nawad-an og balanse sa motor.
Ang mga biktima gidala sa Balamban District Hospital.
Hinuon nakagawas na sila sa tambalanan. / GPL