4 anyos batang lalaki ‘gidagit’, gibilin sa Colon
Nabalik na ang 4 anyos nga batang lalaki nga gidala sa usa ka wala mailhing tawo samtang nagduwa daplin sa karsada sa North Reclamation Area sa luyo sa usa ka hotel, dakbayan sa Sugbo sa alas 10 sa buntag sa Martes, Oktubre 24, 2023.
Ang apohan sa bata nga si Salvacion Buena, 80, natingala kon nganong wala na diha sa karsada ang iyang apo nga tungod niini, dali sila nga nangita apan wala gyud makit-i.
Dunay nakatug-an nga gibitad kini og hamtong nga lalaki ug giba’ paingon sa North Bus Terminal hinungdan nga ilang gipasusi ang mga kuha sa CCTV camera.
Nasuta nga tinuod ang gipangsulti sa mga saksi.
Ila dayon nga gipa-blotter sa Mabolo Police Station ang hitabo aron matabangan sila nga mauli ang bata nga luwas ug madakpan sa labing dali nga panahon ang nidala sa bata.
Nanawagan usab sila sa sibyaanang dyHP dala ang hulagway sa bata ug ang kuha sa CCTV aron kon dunay nakabantay sa biktima, motawag dayon sa sibyaanan ug maluwas nila kini.
Pagkagabii sa samang adlaw, human nanawagan sa dyHP ang apohan, dunay nipahibawo nga napalgan ang bata sa dalan Colon, dakbayan sa Sugbo ug gi-turnover sa Carbon Police Station.
Gikalipay pag-ayo ni Salvacion Buena nga nabalik na ang iyang apo sa tuhod.
Siya nanghinaot nga madakpan ang nikuha sa bata.