Giingong gitiunan og kutsilyo dihang giingong gi-rape ang 4 anyos nga bata nga babaye sa 62 anyos nga uyoan niadtong Biyernes, Marso 8, sa usa ka barangay sa lungsod sa Dumanjug, habagatang kasadpang Sugbo.
Ang insidente gi-report sa pamilya sa kapulisan sa Lunes sa buntag, Marso 11, 2024.
Si Police Staff Sgt. Vilma Caballero, chief sa Women and Children Protection Desk (WCPD) sa Dumanjug Police Station nga nahinabi sa Superbalita Cebu, niingon nga ang insidente nahibaw-an na sa pamilya sa Dominggo sa gabii.
Ang suspek gihulagway nga paralisado na sa pikas lawas human na-stroke.
Ang inahan nga nagpangidaron og kapin sa 30 anyos nagtrabaho sa usa ka transport cooperative.
Matod ni Caballero nga gihugasan sa inahan ang bata ug giilisan og diaper apan nireklamo kay sakit ang iyang kinatawo.
“Ana ang bata, Ayaw kay sakit, Ma. Gisusi sa inahan. Nakita gyud ang dili mao,” dugang ni Caballero.
Gipahiling dayon sa mga polis ang biktima sa Pink Room sa Vicente Sotto Memorial Medical Center (VSMMC) ug positibo ang resulta, nahilabtan ang bata.
Ang suspek wala masikop kay milapas na og 36 oras sukad sa pagkahitabo busa ipasaka na lang nila ang kaso pinaagi sa regular filing.
Kaso nga rape through sexual assault ang ipasaka batok sa suspek.
Matod sa inahan nga siya ug ang iyang bana pulos nagtrabaho busa iyang gibilin ang ilang anak ngadto sa iyang babaye nga igsuon, kinsang bana mao ang suspek.
Si Caballero niingon nga ang bata nibutyag kaniya nga gitiunan siya og kutsilyo sa suspek dihang gihinol ang pribado nga bahin sa iyang lawas. / GPL