Nalumos ang usa ka 4 anyos nga batang lalaki sa sapa sa Sitio Tal-ot, Brgy. Inayawan, Dakbayan sa Sugbo sa ala 1 sa hapon sa Dominggo, Hunyo 30, 2024.
Ang bata nadala sa ospital apan gideklarar sa mga doktor sa Cebu City Medical Center (CCMC) nga dead-on-arrival (DOA).
Si Police Corporal Jaymos Tordios, imbestigador sa Inayawan Police Station, nibutyag sa Superbalita Cebu nga ang insidente gitaho sa ilang buhatan sa alas 7 sa buntag sa inahan nga 19 anyos uban sa apuhan.
Matod pa niini nga gipahibalo sila sa mga silingan nga nalumos ang iyang anak sa sapa.
Gitabang nila ug gidala sa CCMC apan nakabsan na kini sa kinabuhi.
Sumala sa inahan, wala nila mabantayi ang iyang anak kay nalipat siya kay nagbantay sa duha ka mga manghod.
Ang sapa duol ra sa ilang panimalay hinungdan nga naabot sa pagsuroy ang bata.
Gipasabot ni Tordios nga posibling na slide ang biktima ug natagak sa lawom nga bahin hinungdan nga nalumos.
Way nakakita gilayon sa biktima hinungdan nga wala masalbar. Gipadayag ni Tordios nga way foul play, disgrasya ang nahitabo.
Wala sab diha atol sa insedente ang amahan sa bata. / GPL