Namatay ang usa ka 4 anyos nga batang babaye human malatayi ang ulo niini sa ligid sa usa ka sports utility vehicle (SUV) alas 7 sa gabii sa Sabado, Abril 12, 2025, sa Salvador Extension eskina Camanchile Drive, Sitio Camanchile, Barangay Labangon, Dakbayan sa Sugbo.
Ang biktima nga nakabsan sa kinabuhi dihadiha dayon giila nga si Naizah Ayrin Alpida, residente sa Sitio Andang, Barangay Labangon.
Sa imbestigasyon sa Traffic Enforcement Unit (TEU) sa Cebu City Police Office nga samtang nagsubay sa karsada sa Salvador Extension ang Toyota Fortuner nga gimaneho ni Catalino Nadonza Nacario, 70, residente sa Camanchile Drive, kalit lang nga dunay nidumbol sa walang ligid niini.
Wala mohunong ang drayber apan pipila ka gutlo ang nakalabay mibalik kini human gipahibawo sa iyang ig-agaw nga nakaligis siya og bata.
Dali nga nanawag og medical team ang mga tawo sa dapit apan sa pagsusi sa pulso sa biktima wala na kiniy vital sign.
Sigun sa inahan sa biktima nga nananghid niya ang iyang anak nga mangihi samtang naninda siya og pagkaon.
Gidagan na lang siya sa usa ka istambay nga nagpahibawo nga ang iyang anak naligsan.
Kasamtangan nga gidala ang drayber sa buhatan sa TEU ug mag-atubang og kasong Reckless Imprudence Resulting in Homicide.
Apan matod ni Police Lieutenant Colonel Jomar Medil nga dili na mopasaka og kaso ang ginikanan sa bata.
Misaad usab ang nakabangga nga siya ang moabaga sa tanan nga gasto sa pagpalubong sa biktima. / AYB