4 gipamusil patay

4 gipamusil patay
Tampo nga hulagway

Upat ka mga tawo ang gipamusil patay sa Sugbo, tulo sa Cebu City samtang ang usa sa Carcar City.

Duha sa mga pagpamusil sa Cebu City nahitabo sa Brgy. Mambaling sa usa lang ka adlaw.

Unang pagpamusil sa Cebu City nahitabo sa alas 6:35 sa gabii sa Martes, Oktubre 31, 2023 sa Unit 3, Opra, Barangay Kalunasan, dakbayan sa Sugbo.

Ang biktima giila sa iyang mga silingan nga si Jacob Calo Ebrada, hingkod, nagpuyo sa maong lugar.

Sigun sa mga saksi nga taodtaod na nga nagpaabot ang suspek nga giila nga si Junie Mansa­nales, taga Brgy. Apo, lungsod sa Argao, habagatang Sugbo.

Ang tibuok hitabo, gikan sa paghuwat sa suspek sa biktima ngadto na sa pagpamusil nakuha sa closed circuit television (CCTV) hinungdan nga nailhan si Mansanales.

Nasuta nga nag-inom pa ang suspek sa wa pa niabot si Ebrada.

Sa dihang nakita niini nga naa na ang biktima, kalit lang niya nga giduol ug gihapak sa iyang armas nga gituohang kalibre 45 nga pistola.

Human niya mahapak si Ebrada, gipusil dayon niya nga niresulta sa pagkahagba, apan ang suspek nga wala magtabon sa nawong, nibalik pa ug giusban makaduha sa pagpusil ang biktima aron pagsiguro nga mamatay.

Ang Guadalupe Police Station mosusi pa kon sakto ba ang pag-ila sa suspek.

Si Mansanales ang gidudahan usab nga maoy nipusil sa usa ka Climark Blanco, 24, taga Basak Pardo, Cebu City sa Barangay Pawa, Dumanjug niadtong Oktubre 28, 2023 sa alas 4 sa hapon.

Ang ikaduha nga pagpamusil nahitabo sa Sitio Puntod, Barangay Mambaling, Cebu City.

Ang biktima nga si Jaggy Dave Lim Sembrante nga nagpuyo ra usab sa maong dapit namatay human pusila samtang naglingkod daplin sa karsada.

Sa imbestigasyon sa Mambaling Police Station nasuta nga usa ka wala mailhing lalaki nga sakay og itom nga Yamaha NMax, nag sul-ob og facemask, helmet ug long sleeve nga color itom, nipusil sa biktima tumong sa liog.

Gisusi pa nila ni Police Major Jonathan Beethoven, hepe sa Mambaling police, ang motibo.

Samtang pagka alas 11 sa gabii, gipusil patay usab ang usa ka konduktor sa Sunrays Bus Liner sulod sa ilang grahean sa Dan C. Padilla, Brgy. Mambaling.

Ang biktima giila nga si James Kenneth Sanchez, konduktor, samtang ang suspek kauban ra usab nga konduktor nga giila nga si Christian Rey Villafuerte, 21, taga Sitio Riverside, Brgy. Pahina Central, dakbayan sa Sugbo.

Sa imbestigasyon sa Mambaling Police Station, nasayran nga nagkalalis na ang duha sa sayo pa.

Ang ilang panaglalis nagsugod sa probinsya sa Sugbo.

Sa gilusad nga follow up operation nadakpan hinuon pagka kaadlawon sa Huwebes, Nobiyembre 2, si Villafuerte sa Duljo Fatima, dakbayan sa Sugbo.

Nakuha sa kapulisan ang usa ka 9mm Ingram sub-machine pistol nga dunay mga bala sa magazine niini.

Samtang sa Dakbayan sa Carcar, napusilan patay sa alas 6 sa gabii sa Miyerkules, Nobiyembre 1 sa uyoan ang drayber nga giangkasan sa iyang lalaki’ng pag-umangkon nga iya untang target sa Sityo Ylaya, Brgy. Bolinawan, Siyudad sa Carcar.(Basaha ang lahi nga estorya.)

Ang biktima nga napagan giila nga si Sean Gantuangco, 23 , taga Proper, Valladolid sa maong siyudad.

Ang suspek giila nga si Marcialo Baquiler, alyas Boy, 60, minyo samtang ang naangol nga mao untay gipusil sa suspek mao si Josephus Divinagracia, 39, minyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph