Nakaangkon og grabeng bun-og ug samdan ang upat ka mga babaye nga nanaglakaw daplin sa dan nga gipangharos sa L-300 van sa national highway sa Barangay Tapon, lungsod sa Dalaguete, alas 3:45 sa hapon, Dominggo, Hunyo 23, 2024.
Ang nakabangga nga L-300 van gimaneho ni Mico, 31, ulitawo, ug taga Arellano Boulevard, Barangay San Roque, dakbayan sa Sugbo.
Ang mga biktima mao sila si "Geena", 39, taga Tapon, Dalaguete; "Mera", 17, dalaga, taga Cansuje, lungsod sa Argao; "Rosie", 19, dalaga; taga Barangay Sacsac, Dalaguete; ug "Sha-Sha", 20, dalaga ug taga Jampang, lungsod sa Argao.
Ang mga tinuod nga ngan sa mga biktima ug sa drayber gipugngan ning mantalaan subay sa hangyo sa kapulisan.
Basi sa imbestigasyon sa kapulisan sa Dalaguete ubos sa kamandoan sa ilang hepe nga si P/Maj. Vincent Awit Zozobrado, nasayran sa Superbalita Cebu na ang maong L-300 van gikan sa outing sa Alcoy nga gisakyan sa grupo nga nangaligo sa dagat ug nibiyahe na pauli sa dakbayan sa Sugbo.
Apan pag-abot sa Barangay Tapon, Dalaguete, ni-overtake kini sa usa ka motorsiklo apan nasubrahan hinungdan nga naharos niini ang mga biktima nga naglakaw daplin sa dan.
Ang mga biktima gidali sa pagtabang sa mga rescuer sa Dalaguete Bogo Argao District Hospital human nakaangkon og grabeng mga bun-og ug samad.
Ang drayber gikustodiya sa kapulisan sa Dalaguete samtang nagpaabot kini sa dugang imbestigasyon ug pagpasaka sa kasong reckless imprudence resulting to multiple physical injuries. / DVG