4 ka bata nakasaksi pagpatay sa inahan

Bohol map. (SunStar photo)
Bohol map. (SunStar photo)

Nasikop ang lalaki nga nipusil-patay sa iyang 22 anyos nga kapuyo atuba­ngan sa ilang upat ka mga bata sa Purok 1, Barangay Looc, lungsod sa Panglao, lalawigan sa Bohol niadtong Sabado sa buntag, Mayo 4, 2024.

Si Police Major John Khaley Sanchez, hepe sa Panglao Police Station, nibutyag nga ang suspetsado usa ka 30 anyos nga taga Barangay Doljo, Panglao.

Nigawas sa ilang imbestigasyon nga selos ang motibo sa pagpatay sa suspetsado sa iyang kanhi kaipon.

Giingong kalit naabot ang suspetsado sa balay sa biktima ug dayong pusil sa ulo gamit ang kalibre 357 nga armas atubangan sa upat ka mga bata ug laing saksi.

Sa nakuha nga imporma­s­yon sa kapulisan nasuta nga bag-o lang nanganak ang biktima.

Human sa hitabo, dali nga nisibat ang suspetsado ug ang armas nga iyang gigamit gilabay niya kini sa kalapokan nga lisud napangitaon.

Nadakpan hinuon sa gilusad nga manhunt operation sa Panglao Police Station ang suspetsado pinaagi sa abag sa mga opisyal sa Barangay Doljo.

“Iyang gilabay dili ingon layo sa lugar pero lisod kuhaon, usa pa lapokon, giadto namo ang lugar pero lisod gyud siya kuhaon, lapokon, delikado ang lugar,” matod ni Sanchez.

Dugang ni Sanchez nga taudtaod na nga nagbuwag ang duha gani lahi na nga barangay nagpuyo ang suspetsado apan duna silay upat ka mga anak nga pulos pa menor de edad.

Gusto unta matod pa sa suspetsado nga makigbalik apan giingong nagdumili na ang biktima nga maoy hinungdan nga iya kining gipatay.

Giandam na ang kasong murder sa Panglao Police Station batok sa suspetsado ug gipangkuha na usab ang mga ebidensya. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph