Gi-impound ang upat ka e-bike samtang gihugtan sa mga awtoridad sa Dakbayan sa Mandaue ang pagpatuman sa ban niini sa mga dagkong dalan.
Nagpabiling hugot ang kagamhanan sa ilang polisiya batok sa e-bikes sa major roads, dungan sa pag-ingon nga mas prayoridad ang kaluwasan sa publiko kaysa kasayon sa biyahe samtang gihingusgan ang operasyon.
Sumala ni Hyll Retuya, ang pangulo sa Traffic Enforcement Agency of Mandaue (Team), upat ka e-bike ang nasakmit sa operasyon niadtong Miyerkules sa buntag duol sa University of Cebu–Lapu-Lapu and Mandaue (UCLM), human makadawat og mga report nga duna gihapoy mga drayber nga nagmagahi sa pagsunod sa balaod sa dakbayan.
“Sa mga e-bike, bisan pa sa mga nanggawas nga balita nga tingali tugotan na sila sa ubang lugar, dinhi sa Mandaue City, lig-on ang among baruganan nga dili gyud tugotan kining mga e-bike nga mo-operate sa siyudad, ilabi na sa mga highway,” matod ni Retuya.
Gipasabot niya nga ang operasyon gihimo tungod sa mga reklamo gikan sa publiko, hinungdan nga daling nagpadala og mga personnel ang Team sa maong dapit.
Matod niya duna sa’y ubang mga drayber nga nakasibat sa dihang nakita ang mga enforcer.
Gipahimangnuan ni Retuya ang mga malapason nga mag-atubang sila og dako nga multa.
Ang mga na-impound nga unit mahimo lang makuha og balik kon mabayran ang P5,000 nga multa.
“Kon ma-impound mo dinhi, i-release namo human ninyo og bayad sa multa. Kon madakpan mo og usab, mobayad na sab mo,” pasidaan niya.
Dugang sa hepe sa Team, nagpakatap na sila og mga enforcer, lakip na ang mga miyembro sa MASCO, sa mga strategic nga dapit aron bantayan ug dakpon ang mga mosupak.
Giangkon niya nga hagit ang pagpatuman niini tungod kay duna gyud mga drayber nga mosuway sa pasensya sa mga awtoridad.
Gawas sa pagsupak sa balaod, nabalaka sab si Retuya sa kaluwasan sa dalan.
Iyang namatikdan nga daghang e-bike riders ang walay saktong dokumento ug sagad iresponsable sa dalan.
Wala sab dawata ni Retuya ang rason nga ang pagsaka sa presyo sa lana maoy katarungan ngano nga mogamit og e-bike sa highway.
Matod niya ang safety o kaluwasan sa tanan mao ang labing importante.
Giklaro sa opisyal nga mahimong pasagdan ang mga e-bike sa mga dapit nga dili daghang sakyanan sama sa mga subdivision, apan hugot kining gidili sa highway.
Gipunting sab ni Retuya nga daghang e-bike karon ang walay saktong rehistro tungod kay nasuspende ang proseso sa rehistrasyon niadtong 2024.
Gigamit sab niya nga ehemplo ang Dakbayan sa Talisay nga matod pa niya lisod na kontrolon ang gidaghanon sa e-bikes nga mo-counterflow pa sa dalan. / ABC