Upat ka mga high value individual (HVI) nasikop sa mga buy-bust sa kapulisan sa Dakbayan sa Sugbo ug Mandaue.
Dul-an sa P1 milyon nga balor sa ilegal nga drugas ang nasakmit sa Cebu City Police Office atol sa managlahi nga anti-illegal drug operations.
Unang nadakpan ang duha ka drug personalities sa buy-bust operation sa mga sakop sa City Drug Enforcement Unit (CDEU) ug Intelligence Unit sa pagpangulo ni Police Captain Dave Marvi Villaluz alas 11:05 sa Miyerkules sa gabii, Hulyo, 10, 2024 sa Brgy. Busay, Dakbayan sa Sugbo.
Ang mga suspek giila sa mga alyas nga Ker ug Kim, pulos mga lumolupyo sa Brgy. Malubog, bukirang dapit sa siyudad sa Sugbo.
Nakuha gikan kanila ang mga pinutos sa gituohang shabu nga motimbang og 50 gramos nga dunay standard drug price nga P340,00. Pagka Biyernes, Hulyo 12, 2024, laing HVI nasikop sa Labangon Police Station sa A. Lopez St., Brgy. Labangon, Dakbayan sa Sugbo.
Ang suspek giila nga si alyas Dudung, 23, taga Sitio Mahayahay 1, Brgy. Calamba, Dakbayan sa Sugbo.
Nakuha sa mga polis sa Labangon Police Station ang 60.2 gramos nga gituohang shabu nga dunay standard drug price (SDP) nga P409,360.Ang nakuha nga mga ebedensya giduso na sa PNP Forensic Unit 7 alang sa chemical analysis.
MANDAUE CITY
Usa ka HVI nasikop sa buy-bust sa mga sakop sa City Drug Enforcement Unit /City Intelligence Unit sa Mandaue City Police Office alas 10:51 sa gabii sa Hulyo 12, 2024 sa Dan V. Albäño, Sityo Little Tokyo, Brgy. Maguikay.
Ang suspek giila nga si alyas “JunJun”, 33, minyo, taga Sityo Kabulihan, Brgy. Alang-alang, Mandaue City.
Ang kapulisan nakadawat og impormasyon sa kalihukan ni Junjun ug gi-validate.
Nasakmit gikan kaniya ang 500 gramos sa gituohang shabu nga balor og P3.4 milyunes. / AYB, DVG