4 ka langyaw, 2 ka truck boy naangol sa bangga

Dumanjug, Cebu map.
Dumanjug, Cebu map. (Google Maps)

Upat ka mga langyaw ug duha ka mga Pinoy nangaangol sa panagbangga sa duha ka mga sakyanan sa national highway sa Sityo Lumboy, Barangay Camboang, lungsod sa Dumanjug, alas 10:30 sa buntag sa Huwebes, Mayo 16, 2024.

Nalambigit nga sakyanan mao ang Isuzu mini dump truck nga gimaniho ni Elvin Pepito, hamtong, lumad nga taga San Isidro, Leyte ug usa ka awto nga gimaniho ni Bono Luther Mahinay, hamtong, kinsa gikataho’ng wa naangol gawas sa iyang mga sakay.

Ang sakay sa awto nga upat ka mga langyaw nakaangkon og minor nga kadaut, giila nga sila si Mohamad Muhanan, 28, minyo, Syrian national; Mahammad Khin, 27, minyo, Syrian national; Patrick DSouza, 27, Indian national; ug Liza Bladavice, 23, dalaga, Russian national.

Samtang, angol usab ang mga truck helper sa mini dump truck nga sila si Efren Aranas, 28, ulitawo, taga Kang -actol Dumanjug, ug Jonathan Pepito, 38, ulitawo, may kapuyo, taga San Isidro, Leyte. Sila pulos nadala sa Barili District Hospital.

Sa imbestigasyon sa Dumanjug police ubos sa kamanduan ni P/Capt. Jan Ace Elcid P. Layug, nasuta nga ang mga langyaw nga sakay sa awto gikan nag-canyoneering sa lungsod sa Badian.

Nagpadulong sila sa Mactan Cebu International Airport sa siyudad sa Lapu-Lapu.

Pag-abot sa blind curve sa Sityo Lumboy, Camboang, nigawas sa iyang lane ang awto hinungdan nga gikasugat ang mini dump truck nga nagpadulong sa kinapusoran sa Dumanjug.

Ang drayber sa mini dump truck nga si Elvin Pepito nilihay unta apan sa kakalit sa iyang paglubag sa manubela, ang mini dump truck nga kargado og mga acetylene gas tank natumba.

Atol ning pagsuwat, nakab-ot ang amicable settlement sa duha ka mga habig hinungdan nga wa na mapasaka ang kaso ngadto sa korte. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph