Upat ka mga lungsod sa tersero distrito ang kwalipikado na isip first class municipalities sa probinsya sa Sugbo.
Kini subay sa “unofficial” update sa Bureau of Local Government Finance (BLGF) sa Central Visayas.
Lakip sa gihimong basehan niini sa pag-compute aron mo-qualify isip first class municipality mao ang annual regular income (ARI) sa miaging tulo ka tuig, sukad sa 2020.
Unang nipahigayon og simulation ang BLGF-7 diin nisaka na ang income classification status sa 34 ka local government units (LGUs) sa Lalawigan sa Sugbo.
Sa unom ka component cities, giingong usa ang dakbayan sa Toledo nga qualified na nga mahimong first-class city.
Samtang ang lungsod sa Barili, Asturias, Pinamungajan, ug Tuburan lakip sa 19 ka mga lungsod sa Sugbo nga nahimo nang first-class municipalities.
Subay sa nasayran, niabot na sa P1.3 bilyunes ang ARI sa naasoyng dakbayan, samtang ang mga ni-qualify isip first-class municipalities gilantaw nga nikita na og P200 milyunes matag tuig.
Hinuon, gipahibalo sa BGLF-7 nga nagpadayon pa ang deliberation sa Department of Finance (DOF), kinsa gikatakdang mopagawas og department order sa bag-ong income classes sa mga lokalidad.
Sa maong kalamboan, gikalipay kini sa mga opisyal sa mga hingtungdang LGU tungod sa pagtaas na sa ilang income classification nga nagpasabot sa dugang benepisyo nga madawat gikan sa nasudnong kagamhanan.