Adunay upat ka mga Filipino ang nangaangol sa Israel human gilusad sa Iran ang air strike niadtong Sabado, Hunyo 14, 2025, pahibalo sa Department of Foreign Affairs (DFA).
Ang upat kabahin sa usa ka grupo nga didto sa park sa Rehovot, usa ka siyudad 20 kilometros habagatan sa Tel Aviv, dihang niigo ang missile sa Iran sa maong dapit. Dali nga gidala sa ospital ang mga naangol aron matambalan.
Sa laing insidente, giguba sa missile ang balay sa usa ka Filipina sa Ramat Gan, kasadpan sa Tel Aviv. Wala siya maunsa human mipasilong sa bomb shelter. Gitabangan siya sa Embahada sa Pilipinas.
Ang pag-atake sa Iran usa ka tubag sa paglusad sa Israel sa daghang missile nga nag-target sa daghang Iranian military assets ug personnel kaniadtong Biyernes, Hunyo 13, 2025.
Gisusi karon sa DFA kon irekomendar ba ang boluntaryo o mandatoryong pagpauli sa gibana-bana nga 30,000 ka mga Filipino nga nagpuyo ug nagtrabaho sa Israel. Adunay mga contingency plan kon mograbe ang panagbangi.
Gisirhan na sa Israel ang ilang airspace uh gisuspenso ang tanang flights. Ang Embahada sa Pilipinas sa Tel Aviv nagpadayon sa pag-isyu og mga safety advisory nga nag-awhag sa mga Pinoy nga magpabilin sa bomb shelters human sa pagtingog sa mga sirena aron malikayan ang pagkahulog sa mga guba gikan sa mga na-intercept nga missile. / Gikan sa mga wires