Upat ka mga tawo nangalambigit sa managlahing mga aksidente sa kadalanan sa Metro Cebu sa Lunes sa buntag, Pebrero 12, 2024, usa kanila namatay.
Ang namatay human madasmagi sa usa ka van ug nalagpot pa ngadto sa laing sakyanan mga alas 5:30 sa buntag sa atubangan sa Carmenville Subdivision, Brgy. Tunghaan, Minglanilla giila nga si Minda Francisco, 50, minyo, nagpuyo sa mao nga barangay.
Naangol mao ang iyang apo nga babaye nga wa pa masayri kon pila ang edad.
Sa imbestigasyon sa kapulisan sa Minglanilla ubos sa kamandoan sa ilang hepe nga si Police Capt. Kalvin Jomari Golitod, ang drayber sa Isuzu van nga nakaigo sa mga biktima, giila nga si Homilito Lapiz Omayao, 50, minyo, taga Purok 3, Barangay Bunga, siyudad sa Toledo.
Matod sa kapulisan nga si Omayao nagbiyahi gikan sa norte padulong sa habagatan.
Sa samang higayon, usa ka Toyota Hilux nga gipanag-iya sa Cebu Provincial Government nga gimaniho ni James Caburnay Romas, 37, minyo, taga Brgy. Putingbato, siyudad sa Toledo nagbiyahe gikan sa habagatan padulong sa norte.
Si Romas nihunong sa dapit nga nahitaboan aron makatabok sila si Francisco ug ang iyang apo.
Apan sa pag-abot sa mga biktima sa solid center line sa dalan, nadasmagan sila sa wing van, ang lola nalagpot ngadto sa Toyota Hilux nga naghunong pa, sa kakusog sa impact.
Ang mga biktima gidala sa Minglanilla District Hospital apan, alas 6:35 sa buntag, gideklarar sa doktor si Francisco nga patay.
Si Omayao gikustodiya na sa kapulisan sa Minglanilla alang sa posibleng pagpasaka og kaso nga reckless imprudence resulting in homicide.
CEBU CITY
Managtiayong senior citizens nangaangol human nasaghid ang ilang gisakyan nga motorsiklo sa usa ka awto alas 6 sa buntag, Lunes, sa Barangay Lahug, dakbayan sa Sugbo.
Sila si Andrew Morales, 68, taga Barangay Boot, siyudad sa Sugbo ug ang iyang asawa nga si Maria Theresa, 61, gipangdala sa tambalanan.
Si Andrew nakaangkon og samad sa ulo ug mga bun-og sa kalawasan samtang si Maria Theresa nakaangkon og pangos sa tuong tuhod.
Si Maria Theresa nga nahinabi sa Superbalita Cebu sa dapit nga nahitaboan nagkanayon nga padulong sila sa Cebu City Hall alang sa duty.
Nagdali sila dihang kalit nga nihunong sa ilang atubangan ang Toyota Wigo (NEL-6591).
Tungod niini, nilihay sila apan nasangit sila sa kilid sa awto.
Nabunal sila human natumba ang Honda Wave nga gimaneho sa iyang bana.
Si Brendo Gonzales, drayber sa awto, taga dan Borces, Brgy. Mabolo, dakbayan sa Sugbo nga nahinabi sa Superbalita Cebu, niangkon nga kalit siyang nihunong kay ang laing motorsiklo nga naa sa iyang atubangan nihunong usab.
Ang drayber sa mao nga motorsiklo gikataho’ng nipunit sa eye glasses nga natagak.
Sa kabalaka nga iyang madasmagan, dali siyang ni-brake sa awto apan kalit nga nilugapak sa likod dihang naigo siya sa motorsiklo sa mga Morales.