Sakit nga gabii ang nahitabo sa Pilipinas kay upat ka Pinoy warriors ang nangapilde didto sa Japan nga gipahigyon sa Aichi Sky Expo in Tokoname, Aichi, Marso 29 (PH time).
Si Giemel Magramo, Michael Dasmarinas, Jeo Santisima ug Yeroge Gura pulos napilde sa ilang managlahi nga away sa susama nga boxing event.
Nawagtang kang Magramo ang iyang Oriental and Pacific Boxing Federation (OPBF) super flyweight belt human mapilde kang Aoi Yokoyama pinaagi sa unanimous decision.
Ang tulo ka judges mipabor kang Yokoyama, 23 anyos nga kanhi Japanese amateur champion, sa iskor nga 117-111, 118-110 and 117-111.
Natagak si Magramo sa 30-5 with 23 knockouts, samtang si Yokoyama misaka sa 3-0.
Si Dasmarinas (36-4-2, 25 KOs), sa laing bahin, nasugamak sa fifth round technical knockout batok Kyosuke Okamoto (10-1, 7 KOs).
Gipaligid ni Okamoto si Dasmarinas sa 1:18 mark sa fifth round. Samtang, si Santisima (25-8, 21 KOs) napilde kang Ei Go (5-0, 2 KOs) sa unanimous decision.
Ang tulo ka judges mipabor ni Go sa scorecards nga 79-73, 79-73 and 77-75.
Si Yeroge Gura (8-2-1, 3 KOs) nalupig ni Hayate Hanada (3-1-1, 1 KO) sa unanimous decision. Labaw si Hanada sa tulo ka judges sa scorecards nga 79-73, 78-74 and 77-75. / RSC, EKA