Matag sa Sinulog Festival, dili kalikayan dunay magpabadlong sama sa sobra kahubog ug mangita og gubot ug uban pang kriminalidad.
Mao kini ang hinungdan nga kanunay mangandam ang Cebu City Police Office (CCPO) labina sa hangyo sa Cebu City Hall alang sa upat ka ‘bust-bus’ nga himuong holding facility sa mga badlungon.
Matod ni Police Lt. Col. Janette Rafter, deputy city director for operations sa CCPO, ang upat ka bust-bus naa sa Mango Avenue nga tapukanan sa mga batan-on nga sagad mag inom, Fuente Osmeña, Plaza Independencia ug sa South Road Properties (SRP).
Iyang gipasabot nga kon dili kini buhaton mapuno ang custodial facilities sa police stations.
Nabantayan ni Rafter sa Sinulog sa miaging tuig nga nagtapok ang mga batan-on sa mga lugar nga dunay mga kalingawan sama sa Mango Ave. sa Sinulog grand parade.
Nibahad si Rafter nga kon dunay magrambol nga grupo sa mga batan-on tungod sa kahubog, ila kining dakpon ug pasakaan gyud og kaso.
“Kon naay nag sinukmagay diha bisan pag moingon sila nga nag settle sila, but ang atong kapulisan mo-file gyud og kaso,” matod ni Rafter.
Sa miaging semana, dunay insidente sa kagubot sa mga hubog sa usa ka imnanan sa uptown area nga gihimoan na karon og imbestigasyon ug giila kinsa ang mga nalambigit niini.
Kon ilang mailhan ang duha ka mga habig, sila ikiha sa CCPO.
Gawas sa kapin lima ka libo ka mga polis nga ipakatap sa adlaw sa Sinulog, dunay nga nakasibilyan nga mga polis ang maglibot sa dakbayan diin ang ilang tahas mao ang pagpangita sa mga hilabtanon og mga mahalong butang.