NAHIBALIK na ang upat sa unom ka pulpit panels sa Archdiocesan Shrine of Patrocinio de Maria Santisima sa Boljoon human kini ma-recover ug mauli sukad sa pagkawagtang niadtong 1980s.
Ang panels, gikulit nga mga santos ang nakit-an pagbalik niadtong Pebrero 2024, og gi-donate ngadto sa National Museum, ug opisyal nang nabalik sa Archdiocese sa Cebu niadtong Huwebes, March 13, 2025.
Gibiyahe kini ngadto sa Boljoon niadtong Marso 14 ug i-display og balik unya sa Miyerkules, Marso 19.
Usa ka pontifical mass ang himuon ni Cebu Archbishop Jose Palma unya sa Biyernes, Marso 21 sa pag-instalar ug opisyal nga pirmahanay sa pag-tugyan sa dokumento.
Sa misa nga gihimo niadtong Marso 14, 2025 ni Fr. Bryan Brigoli, chairman sa Cebu Archdiocesan Commission on Culture, sentro sa iyang wali ang upat ka panel nga dili lang pagkahibalik sa nawagtang nga treasure apan pakig-uli ug pagdawat kon unsa ang nawagtang.
"To return is also to reconcile," matod ni Brigoli nga nagdasig sa mga devotees sa pagpamalandong sa kahulogan sa pagkahibalik sa upat ka pulpit panel sa Boljoon.
Tulo ka punto ang wali ni Brigoli ‘giuli’ , ‘pakig-uli’ , ug ang ‘pagdawat sa giuli’.
Ang panels mao ang kinulit nga mga santos nga sila si San Alypius, Santo Tomas sa Villanueva, San Agustin sa Hippo, ug San Possidius nga nawagtang sukad niadtong 1980s.
Nakit-an kini pagbalik niadtong February 2024 ug gidonar sa National Museum of the Philippines (NMP)sa mga collector nga sila si Edwin ug Aileen Bautista isip "gift to the nation." /CDF