Gihulagway nga nawala sa iyang kaugalingon ang giingon nga adik dihang namusil ngadto sa mga tawo nga iyang masugatan, usa ang samaran samtang ang suspek nagpusil sa kaugalingon.
Ang insedente nahitabo alas 9:30 sa buntag, Huwebes, Agusto 7, 2025, sa Phase 1, Countryside Subdivision, Barangay Tayud, Lungsod sa Liloan.
Ang suspek giila nga si Jeffrey Cortes Jr., kapin sa 40-anyos, buwag sa asawa ug residente sa naasoy’ng subdivision.
Base sa imbestigasyon nga unang namusil ni Cortes ngadto sa grupo sa mga construction worker nga sakay sa van ug paingon nga mogawas sa subdivision.
Ang mga biktima giila nga sila si Anthony Penares, 19, Rene Lim, 27, pulos taga Lungsod sa Catmon, ug Cerili Ouano, 42, taga Bogo City.
Gibutyag ni Police Chief Master Sgt. Arni Goc-ong, imbestigador sa Liloan Police Station sa dihang nahinabi sa Superbalita Cebu, nga kalit lang nga namusil si Cortes ngadto sa mga mga biktima samtang sakay sa van.
Bisan nga gipabulhot sa drayber sa van ang pagpadagan, nigukod ang suspek ug giusban og pusil, maayong na lang nga way naigo kanila.
Yano nga naglakaw ang suspek ug aduna siyay nasugatan nga laing biktima nga si Jeford Gepolangca, 37, nga taga Probinsiya sa Guimaras ug gipusil sab nga naigo sa liog.
Ang mga silingan nitabang sa biktima ug nanawag og polis samtang si Cortes nisulod sa iyang balay, unya wala madugay, nadungog ang duha ka buto sa armas.
Nirespondi ang Liloan police ug Danao SWAT ug ilang naabtan si Cortes nga patay na sa higdaanan nga may samad pinusilan sa dughan, samtang ang armas nga gituohang gigamit nakit-an tupad sa iyang lawas.
“Kini siyang suspek ilado kaayo sa dapit nga manuyopay. Unya kon magtama masuko kini nga adunay motan-aw niya ug manghulga,” saysay ni Goc-ong.
Gituohan nga gitripingan sa suspek ang mga trabahante sa construction hinungdan nga namusil apan wala niya naigo ug ang silingan nga iyang naagian maoy gipusil.
Si Cortes nag-inusara niadtong higayuna sa iyang balay kay anaa sa tunghaan ang iyang anak ug gibiyaan sa asawa. / GPL