Upat ka drug suspects ang nangadakpan sa Inayawan Police Station sa managlahi nga anti-illegal drug operation sulod lang sa usa ka oras.
Kini subay sa kampanya batok sa ilegal nga drugas ug gi-target ang lainlaing sitio pinasikad sa surveillance ug intelligence gathering sa pagpangulo sa hepe niini nga si Police Major Kenneth Paul Albotra.
Alas 7:10 sa gabii, Miyerkules, Hunyo 25, 2025, nadakpan ang managhigala sa Sitio Tugas, Barangay Poblacion Pardo, Dakbayan sa Sugbo nga nakuhaan og 10.40 gramos nga gituohang shabu nga mobalor sa P70,720.
Nasikop sab sa kapulisan ang mag-live-in partner sa Sitio Upper Tabucanal, Barangay Poblacion Pardo alas 6:05 sa gabii.
Ang mga nadakpan mao silang alyas Rolymel ug alyas Christy nga nagpuyo ra sab sa maong lugar.
Nakuha gikan kanila ang mga pinakete sa gituohang shabu nga mokantidad sa P69,904 ug ubang ebidensya nga giduso na sa City Forensic Unit alang sa himuon nga chemical analysis.
Ang mga suspek kasamtangan nga gikustodiya sa Inayawan Police Station ug gipasakaha'g kaso sa kalapasan sa Section 5 ug 11, Article II, Republic Act 9165. / AYB