Ang upat ka kanhi Cebu City Hall tax mappers, nga nangita na sa ilang dugay nang suweldo nga wa mahatag, kusganong nihimakak ang ilang sa pangangkon ni City Administrator Collin Rosell nga ang ilang kapakyas pag-report sa gi-reassign nga mga posisyon maoy hinungdan sa pagkalangay sa 10 ka buwan nga suweldo.
Sa una nga pakighinabi, si Rossell niingon nga ang upat ka mga regular nga empleyado nga sila si Filomena Atuel, Maria Almicar Dionzon, Sybil Ann Ybañez, ug Chito dela Cerna ang nagdumili sa pag-report sa ilang gi-reassign nga mga buhatan sa City Hall, nga niresulta sa pagkalangan sa ilang pagpagawas sa suweldo sukad niadtong Hulyo 2023.
Si Ybañez, nga namulong alang sa laing tulo ka mga empleyado, nipaklaro nga wala sila direktang mibalik sa pagtaho sa ilang inahan nga buhatan, ang City Assessor’s Office.
Ila na lang hinuon kining gihimo human nakadawat og paborableng tubag sa ilang petisyon sa Civil Service Commission sa Central Visayas (CSC 7).
“Bakak nga wala mi report sa offices asa mi gi reassign. Ni-report mi didto before mi nag-file sa among apela sa CSC,” matod ni Ybañez sa SunStar Cebu niadtong Miyerkules, Abril 17, 2024.
Dugang pa ni Ybañez nga nitaho sila sa gi-reassign nila nga mga buhatan pagkadawat sa reassignment order niadtong Hunyo 1, 2023. Si Ybañez niingon nga nitaho siya sa Cebu City Operation Second Chance Center; Atuel, sa Cebu City Anti-Mendicancy Office; Diongzon, sa South Road Properties.
Sa laing bahin, si dela Cerna nisumiter sa iyang petisyon ngadto sa CSC 7 sa wala pa ang petsa sa iyang reassignment. Gi-reassign siya sa Cebu City Environment and Natural Resources Office.
Ang upat ka mga empleyado matag usa adunay mga dekada nga kasinatian sa pagtrabaho sa City Hall.
Si Atuel nagserbisyo sa City Assessor’s Office sulod sa 30 ka tuig, si dela Cerna sulod sa 16 ka tuig, Diongzon sulod sa 35 ka tuig ug Ybañez sulod sa 18 ka tuig. Naghupot sila og mga posisyon nga katumbas sa mga salary grade gikan sa 11 hangtod 18.
Sa usa ka press conference niadtong Miyerkules, si Rosell niingon nga ang giingong pagdumili sa upat ka mga empleyado sa pag-report sa ilang bag-ong assignment niresulta sa problema sa budget alignment alang sa mga personnel ug sa ilang mga sweldo kay walay supervisor nga mopirma sa ilang payroll documents.
“Kon wala ka ni-report kon asa ka na assigned, kinsa man ang mopirma sa imong time-in, time-out, ang imong DTR (daily time record)?” matod ni Rosell.
Dugang pa niya nga ang ilang reassignment kabahin sa paningkamot sa City Government sa paglahugay sa mga empleyado ug pagpalambo sa serbisyo.
Iyang namatikdan nga kini usa ka komon nga praktis sa publiko nga sektor ug ubos sa prerogative sa mga mayor isip kabahin sa management.
Matod ni Rosell nga unom ka mga empleyado sa Assessor’s Office ang nakadawat og reassignment order.
Siya miingon nga duha niini nga mga empleyado ang mitaho sa ilang bag-ong mga departamento, ug, sumala pa niya, wala makasinati og mga isyo sa sweldo.
Siya midugang nga ang mga detalye sa reassignment kinahanglan nga gihipos nga kompidensyal.
Matod niya nga ang City Assessor’s Office usa ka high-risk nga departamento tungod kay gipanalipdan niini ang tanang rekord sa mga propyedad sulod sa dakbayan sa Sugbo, ug ang City Government nagbubo og mga paningkamot sa pag-usab sa mga serbisyo ug internal nga estraktura sa buhatan.
Dugang ni Rosell nga nitumaw ang mga seryusong alegasyon sulod sa City Assessor’s Office, apil na ang mga pangangkon nga pipila ka mga propyedad nga gipanag-iya sa City Government ang posibleng gititulo na kini sa pribadong mga tawo. / AML