Upat ka most wanted person sa Central Visayas nga nabutang sa top 5 ug top 10 sa Regional Level ang nangadakpan sa managlahi nga operation sa Probinsiya sa Sugbo ug Bohol niadtong Mayo 27, 2025.
Ang Carcar City Police Station sa Cebu Police Provincial Office (CPPO) nakasikop sa top 5 most wanted person pinasikad sa warrant of arrest nga giluwatan sa korte sa Sitio Cambuntan, Barangay Bolinawan, Siyudad sa Carcar.
Ang maong akusado nagtago sa taas nga panahon human mag-atubang og kasong unom ka ihap sa kasong Statutory Rape.
Ang warrant of arrest giluwatan sa Family Court, 7th Judicial Region, sa Dakbayan sa Talisay nga walay piyansa nga gitugot sa akusado.
Samtang ang Dagohoy ug Sogod Municipal Police Station malampuson sab nga nakasikop sa duha ka top 10 most wanted person sa Barangay La Esperanza, Lungsod sa Dagohoy, Probinsiya sa Bohol.
Ang duha ka akusado dunay mga warrant of arrest sa kasong murder nga giluwatan sa Regional Trial Court Branch 101 sa Lungsod sa Talibon nga walay gitugot nga piyansa ang korte.
Sa susamang adlaw nadakpan sab ang top 10 most wanted sa Probinsiya sa Sugbo nga dunay giatubang nga kaso sa ilegal nga drugas nga giluwatan sa korte sa Dakbayan sa Mandaue.
Ang maong mga akusado pulos gipangbalhog sa mga temporary custodial facility sa matag police station diin sila nadakpan.
Tungod sa maong kalambuan ang hepe sa Police Regional Office (PRO) 7 Police Brigadier General Redrico Maranan nipahalipay sa iyang mga personnel nga malampuson nga nakasikop sa mga most wanted person.
“PRO7 will not allow the communities of Central Visayas to be playgrounds for criminal syndicates. Every operation we launch is backed by solid intelligence and carried out with precision. There will be no safe haven, no blind spot, and no compromise.” matod ni Maranan.
Subling niawhag ang kapulisan sa publiko nga kon duna silay makuha nga kasayuran nga naa sa ilang dapit ang mga tawo nga dunay mga pending warrant of arrest, ila kining isumbong. / AYB