4 nadakpan sa 2 ka operasyon sa PDEA

Duha ka managlahi nga anti-illegal drug operation sa mga sakop sa Philippine Drug Enforcement Agency nga miresulta sa pagkasikop sa upat ka mga drug personalities lakip na ang giila nga regional target-listed individual, Martes, Agusto 20, 2024.

Alas 5:45 sa hapon gihimo sa PDEA 7 Regional Special Enforcement Team uban sa Police Regional Office 7 Intelligence Unit ang buy-bust sa Sityo Sto. Niño, Barangay Quiot, dakbayan sa Sugbo nga miresulta sa pagkasikop sa ilang target nga si Christopher Cansancio alyas Okoy, 40, nga nabutang sa Regional Target List.

Nakuha atol sa maong operasyon ang duha ka pakete sa gituohang shabu nga motimbang sa 10 gramos nga dunay estimated average market value nga P68,000 ug ang buy-bust money.

Alas 3:20 sa hapon sa susamang adlaw unang milusad og anti-illegal drug operation ang PDEA 7 Regional Special Enforcement Team sa pakig-alayon sa Mambaling police station 11, Cebu City Police Office didto sa Sitio Isla Alegre, Barangay Basak San Nicolas dakbayan sa Sugbo nga miresulta sa pagbungkag sa usa ka drug den ug pagkasikop sa tulo ka mga tawo.

Nadakpan sa operation ang ilang target nga drug maintainer nga giila nga si Jobal Rodilias alyas Sadam, 43, ug ang duha ka drug den visitor nga silang Rogen Teleron, 31, ug Jose Ocañada Lariosa Jr III, 29, construction worker.

Nakuha sa mga operatiba ang lima ka pakete sa gituohang shabu nga dunay timbang nga 12 gramos nga dunay estimated average market value P81,600 ug mga drug paraphernalia.

Matod ni Leia Alcantara, information officer sa PDEA7 nga ang drug personality sa Quiot unom ka buwan nila nga gipaubos sa case buildup diin sa ilang sa monitoring maka baligya kinig 100 grams matag semana samtang usa ka buwan nga gipanid-an ang drug den sa Basak San Nicolas.

Nadawat nila ang impormasyon sa maong mga drug personalities gikan sa mga kasaligang tinubdan nga maoy hinungdan nga ila dayon nga gipaubos sa case buildup.

Kalapasan sa Article II, Republic Act 9165 ang ipasakang kaso sa PDEA7 batok sa maong mga suspek./AYB