
Upat ka mga tawo ang gipangdakop human naatlan nga naghingus sa illegal nga drugas sulod sa usa ka abandonadong bus nga gihimong drug den atol sa buy-bust nga gipahigayon sa Philippine Drug Enforcement Agency 7-Regional Special Enforcement Team, uban sa PNP Drug Enforcement Group ug Cebu City Police Office sa alas 12:02 sa udto sa Biyernes, Abril 25, 2025, sa dalan C. Padilla, Barangay Duljo Fatima, Dakbayan sa Sugbo.
Lakip sa nadakpan ang drug den maintainer nga maoy target sa operation nga giila ni PDEA-7 Director Alex Tablate nga si alyas Ricky, 42, taxi driver nga taga Barangay Inayawan sa Dakbayan sa Sugbo.
Ang mga naatlan nga nagsuyop sa sulod sa bus mao silang alyas Joan, 37, taga Duljo Fatima, alyas Jose, 31, bus conductor nga taga lungsod sa Santander ug alyas Abelito, 39, bus conductor nga taga Tabuelan.
Nakuha sa mga sakop sa PDEA 7 ang 12 ka pakete sa gituohang shabu nga motimbang sa 10 gramos nga dunay estimated average market value nga P68,000, lakip na ang buy bust money ug mga drug paraphernalia.
Ang mga nakuhang ebidensya giduso na sa PDEA 7 laboratory alang sa chemical analysis ug proper disposition.
Matod ni Leia Alcantara, information officer sa PDEA7, nga tulo ka semana nila nga gipaubos sa case buildup ang maong drug den human nila madawat ang impormasyon gikan sa kasaligang tinubdan.
Giingon’g makabaligya ang drug den maintainer nga si Ricky og 20 gramos sa shabu matag semana diin ang iyang mga customer mao ra usab ang mga conductor sa bus.
Kalapasan sa Sections 5, 6, 7, 11 ug 12, Article II, Republic Act 9165 ang giandam nga kaso batok sa mga suspetsado. / AYB