4 nga ‘mirakrak’ sa Crips gang nasikop

CRIME SCENE: Mao kini ang dapit sa Brgy. Yati, Liloan, amihanang Sugbo, diin girakrakan sa gituohang mga sakop sa Bloods gang ang mga sakop sa Crips gang sa Huwebes sa kaadlawon, Mayo 9, 2024. Upat sa mga suspek sunodsunod nga nasikop sa mga polis sa Liloan Municipal Police Station. /
CRIME SCENE: Mao kini ang dapit sa Brgy. Yati, Liloan, amihanang Sugbo, diin girakrakan sa gituohang mga sakop sa Bloods gang ang mga sakop sa Crips gang sa Huwebes sa kaadlawon, Mayo 9, 2024. Upat sa mga suspek sunodsunod nga nasikop sa mga polis sa Liloan Municipal Police Station. / TAMPO

Nadakpan na sa kapulisan sa Liloan Police Station ang upat ka nga suspek sa pagpang­rakrak sa Brgy. Yati, lungsod sa Liloan, amihanang Sugbo niadtong Huwebes sa kaadlawon, Mayo 9, 2024 nga nikalas sa kinabuhi sa usa ka 16-anyos nga dalaga.

Ang pag-ila sa usa ka saksi sa usa sa mga sakop sa Bloods gang nisangko sa pagkasikop sa mga suspek sa sunodsunod ug managlahing mga operasyon.

Nasuta nga away sa Crips ug Bloods gang ang motibo sa pagpangrakrak ug napagan lang si Alyza Wagas, 16, taga Looc, Pob­lación, Liloan kay iyang uyab nga sakop sa Crips maoy target.

Matod ni Police Major Eric Gingoyon, hepe sa Liloan Police Station sa usa ka press conference sa Biyernes sa udto, nga ang upat nadakpan sa managlahi nga mga lugar sa Sugbo subay sa nagpadayon nga manhunt operations.

Unang nadakpan alas 11:30 sa Huwebes sa gabii mao si alyas Nilo, 18, nga nasikop sa Brgy. Looc, Siyudad sa Danao.

Gipaubos sa imbestigasyon si Nilo hangtod nga iyang gipang tug-an kinsa ang iyang mga kauban.

Human nibutyag sa tanan, gipang-adto sa kapulisan ang mga balay sa lain pa nga mga suspek.

Pagka alas 2 sa Biyernes sa kaadlawon, Mayo 10, 2024, nadakpan usab nila ang manag­kaluha sa Purok Malipayon, Immaculada, Brgy. Jagobiao, dakbayan sa Mandaue.

Ang duha giila lang sa alyas nga B1 ug B2, pulos 34 anyos, nakuhaan usab og 9mm nga pistola nga dunay unom ka mga bala.

Ang katapusan nga nadakpan alas 4:30 sa buntag mao si alyas Mak-Mak, 21, taga Brgy. Calero, Liloan.

Gibutyag ni Gingoyon nga ang upat pulos mga sakop sa Bloods gang nga karibal sa Crips gang nga maoy grupo niadtong mga batan-on nga gipamusil sa Yati.

NAILHAN

Dunay nakaila kang Nilo atol sa pagpamusil nga maoy ilang gihimong person of interest.

Human nadakpan, gipakita dayon ang dagway sa suspek sa saksi ug positibo niya nga gitudlo nga usa sa mga namusil.

Personal nga atraso ug ba­ngi sa duha ka mga gang ang gitan-aw nga motibo sa krimen sanglit niadtong Sabado, Mayo 4, 2024 duna say krimen pipila ka metros lang gikan sa nahitaboan sa Yati, Liloan.

Nagrambol ang Bloods ug Crips, diin kining grupoha na­lambigit, diin nadunggaban ang sakop sa Bloods nga ang suspek uyab ni Wagas nga 15 anyos.

Tungod niini, gihimo na nga target sa Bloods ang uyab ni Wagas. Ang uyab nakalikay sa pagpamusil. Nausban pa niadtong Miyerkules, Mayo 8, 2024, sa usa ka convenience store sa Magui­kay, Mandaue City diin sila nagrambol.

Ang grupo sa Crips gang namalhin sa usa ka convenience store sa Yati ug nagtiwas og tagay hangtod nga naabtan sila og alas 4 sa kaadlawon sa Huwebes.

Gawas sa upat nga nadak­pan, duna pay laing mga per­­sonalidad nga ilang pangi­taon, usa ani nailhan na sa alyas nga Ugoy.

Si alyas Mak-Mak nga nahinabi sa mga tigbalita niangkon nga miyembro siya sa Bloods gang niadto lang Hunyo 26, 2023.

Iyang gibutyag nga atol sa pagpamusil sa Yati, siya ang driver sa motorsiklo nga gisakyan sa iyang mga kauban sa gang.

“Driver ra ko, Sir. Gipugos ko nila kay kon dili ko mo drive, kulatahon ko nila og five minutes. Ang yawe ug motor nga XRM igo ra gihatag sa akoa,” matod ni Mak-Mak.

Matod ni Mak-Mak nga ang nag-angkas niya si alyas Ugoy nga mao usay namusil sa mga sakop sa Crips.

Kasong murder ug frustra­ted murder ang ipasaka nga kaso sa Liloan Police Station batok sa mga suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph