Nabalhog sa bilangguan ang upat ka indibiduwal human nakuhaan og pinakete nga gituohang shabu sa managlahing lugar samtang usa ka lalaki ang nakuhaan og dili lisensyado nga armas sa susamang adlaw, Mayo 21, 2025.
Unang nadakpan sa Labangon Police Station ang 28-anyos nga si alyas “Cathy” atol sa pagpatrolya sa kapulisan sa Sitio Bognay 3, Barangay Labangon, Dakbayan sa Sugbo alas 8:05 sa gabii ug nakuhan siya og 4 ka gagmay nga pakete sa gituohang shabu nga mokantidad og P2,176.
Samtang 20 minutos ang nilabay, nasikop sab si alyas Sansan, 45, sa kapulisan sa Parian atol sa ilang gipahigayon nga detective patrolling sa Sitio Samayo, Barangay Lorega ug nakuhaan siya og duha ka gamay nga pakete sa ilegal nga drugas nga nagkantidad og P544.
Ang ikatulong nasikop giisip nga street level individual nga drug personality mao si alyas Michael, 36, nga nakuhaan og pipila ka gamay nga pakete sa gituohang shabu nga nagkantidad og P2,720 sa may Sitio Looban, Barangay Tejero atol sa gipahigayon nga operasyon batok sa tanang matang sa ilegal nga kalihukan sa Waterfront Police Station.
Ang katapusang nadakpan nga nalambigit sa ilegal nga drugas nailhan nga si alyas Atan, 35, sa may Ybañez Compound, Barangay Mambaling alas 10:25 sa gabii atol sa gipahigayon nga Oplan Bulabog sa Mambaling Police Station ug nakuhaan kini og 7 ka mga pakete sa gituohang shabu lakip na ang usa ka illegal drug container isip nga ebidensya.
Samtang malapusong na-dak-pan ang gialarma nga armadong lalaki nga si alyas Roger, 44, nga nakuhaan og dili lisensyado nga .38 revolver nga dunay duha ka buhing bala sa may Rockville Subdivision, Barangay Poblacion Pardo alas 8:00 pasado sa gabii,Mayo 21, 2025. / JDG