Upat ka drug personalities ang nadakpan sa mga sakop sa Philippine Drug Enforcement Agency (PDEA 7) sa anti-drug operations sa dakbayan sa Sugbo ug Negros Oriental sa Martes, Marso 5, 2024.
Unang nadakpan alas 4:59 sa hapon mao ang usa ka pintor nga babaye nga nabutang sa regional target list sa PDEA 7 sa Sitio NGA, Barangay Lahug, dakbayan sa Sugbo.
Ang suspek giila nga si Rosemarie Romano, 46, construction painter, nagpuyo sa maong lugar.
Nasakmit sa PDEA ug mga sakop sa Mabolo Police Station ang pito ka mga putos sa gituohang shabu nga 20 gramos nga dunay estimated average market value nga P136,000, lakip sa marked money ug cellular phone.
Matod ni Leia Alcantara, information officer sà PDEA 7, nga tulo ka mga semana nga gipaubos sa case build up ang suspek human nila nadawat ang impormasyon.
Samtang, balay nga gihimong suyopanan sa Sitio Campaclan, Barangay Poblacion, lungsod sa Sibulan, Negros Oriental gironda sa mga sakop sà PDEA Negros Oriental Provincial Office, alas 8:31 sa gabii sa Martes, Marso 5.
Nasikop ang tulo ka drug personalities diin usa niini ang target sa operation nga maoy nagduma sa drug den.
Ang mga nadakpan giila nga sila si Rubennie Furton, 33, auto electric technician nga subject sa operation ug ang duha nga naabtan sa sulod sa drug den nga silang Michael Frank Renacia, 33, auto mechanic; ug Rey Valdez, 46, mamaligyaay og isda.
Nakuha gikan kanila ang 11 ka putos sa gituohang shabu nga motimbang og 10 gramos nga dunay estimated market value nga P68,000 lakip sa marked money, cellphone ug drug paraphernalia.
Ang mga suspek pasakaan og kaso nga kalapasan sa balaod sa gidiling drugas. / AYB